18 సర్గ
Download శుద్ద పాఠ్యం | Audio
తథా విప్రేక్షమాణస్య వనం పుష్పితపాదపమ్ |
విచిన్వతశ్చ వైదేహీం కించిచ్చేషా నిశా౽భవత్ || 1
షడంగవేదవిదుషాం క్రతుప్రవరయాజినామ్ |
శుశ్రావ బ్రహ్మఘొషాన్ స విరాత్రే బ్రహ్మరక్షసాం || 2
అథ మంగళవాదిత్రైః శబ్దైః శ్రోత్రమనొహరైః |
ప్రాబుధ్యత మహాబాహు ర్దశగ్రీవొ మహాబలః || 3
విబుధ్య తు యథాకాలం రాక్షసేంద్రః ప్రతాపవాన్ |
స్రస్తమాల్యాంబరధరొ వైదేహీ మన్వచింతయాత్ || 4
భృశం నియుక్త స్తస్యాం చ మదనేన మదొత్కటః |
న స తం రాక్షసః కామం శశా కాత్మని గూహితుమ్ || 5
స సర్వాభరణై ర్యుక్తొ బిభ్ర చ్ఛ్రియ మనుత్తమామ్ |
తాం నగై ర్బహుభి ర్జుష్టాం సర్వపుష్పఫలొపగైః || 6
వృతాం పుష్కరిణీభిశ్చ నానాపుష్పొపశొభితామ్ |
సదామదైశ్చ విహగైర్వి చిత్రాం పరమాద్భుతామ్ || 7
ఈహామృగైశ్చ వివిధై ర్జుష్టాం దృష్టిమనొహరైః |
వీథీ స్సంప్రేక్షమాణశ్చ మణికాంచనతొరణాః || 8
నానామృగగణాకీర్ణాం ఫలైః ప్రపతితైర్వృతామ్ |
అశొకవనకామేవ ప్రావిశత్ సంతతద్రుమామ్ || 9
అంగనాశతమాత్రం తు తం వ్రజంతమనువ్రజత్ |
మహేంద్రమివ పౌలస్త్యం దేవగంధర్వయొషితః || 10
దీపికాః కాంచనీః కాశ్చిజ్జగృహుస్తత్ర యొషితః |
వాలవ్యజనహస్తాశ్చ తాలవృంతాని చాపరాః || 11
కాంచనైరపి భృంగారై ర్జహ్రు స్సలిలమగ్రతః |
మండలాగాన్ బ్రుసీం చైవ గృహ్యాన్యాః పృష్ఠతొ యయుః || 12
కాచిద్రత్నమయీం స్థాలీం పూర్ణాం పానస్య భామినీ |
దక్షిణా దక్షిణేనైవ తదా జగ్రాహ పాణినా || 13
రాజహంసప్రతీకాశం చత్రం పూర్ణశశిప్రభమ్ |
సౌవర్ణదండ మపరా గృహీత్వా పృష్ఠతొ యయౌ || 14
నిద్రామదపరీతాక్ష్యొ రావణ స్యొత్తమాః స్త్రియః |
అనుజగ్ముః పతిం వీరం ఘనం విద్యుల్లతా ఇవ || 15
వ్యావిద్ధహారకేయూరా స్సమామృదితవర్ణకాః |
సమాగళితకేశాంతాః సస్వేదవదనాస్తథా || 16
ఘొర్ణంత్యొ మదశేషేణ నిద్రయా చ శుభాననాః |
స్వేదక్లిష్టాంగకుసుమా స్సుమాల్యాకులమూర్ధజాః || 17
ప్రయాంతం నైరృతపతిం నార్యొ మదిరలొచనాః |
బహుమానాచ్చ కామాచ్చ ప్రియా భార్యాస్తమన్వయుః || 18
స చ కామపరాధీనః పతిస్తాసాం మహాబలః |
సీతాసక్తమనా మందొ మందాంచితగతి ర్బభౌ || 19
తతః కాంచీనినాదం చ నూపురాణాం చ నిస్వనమ్ |
శుశ్రావ పరమస్త్రీణాం స కపిర్మారుతాత్మజః || 20
తం చాప్రతిమకర్మాణమచింత్యబలపౌరుషమ్ |
ద్వారదేశమనుప్రాప్తం దదర్శ హనుమాన్ కపిః || 21
దీపికాభి రనేకాభి స్సమంతా దవభాసితమ్ |
గంధతైలావసిక్తాభి ర్ద్రియమాణాభి రగ్రతః || 22
కామదర్పమదై ర్యుక్తం జిహ్మతామ్రాయతేక్షణమ్ |
సమక్షమివ కందర్ప మపవిద్ధశరాసనం || 23
మథితామృతఫేనాభమరజొవస్త్ర ముత్తమమ్ |
సలీలమనుకర్షంతం విముక్తం సక్త మంగదే || 24
తం పత్రవిటపే లీనః పత్రపుష్ప ఘనావృతః |
సమీపమివ సంక్రాంతం నిధ్యాతు ముపచక్రమే || 25
అవేక్షమాణస్తు తతొ దదర్శ కపికుంజరః |
రూపయౌవనసంపన్నా రావణస్య వరస్తియః || 26
తాభిః పరివృతొ రాజా సురూపాభి ర్మహాయశాః |
తస్మృగద్విజసంఘష్టం ప్రవిష్టః ప్రమదావనమ్ || 27
క్షీబొ విచిత్రాభరణ శ్శంకుకర్ణొ మహాబలః |
తేన విశ్రవసః పుత్రః స దృష్టొ రాక్షసాధిపః || 28
వృతః పరమనారీభి స్తారాభి రివ చంద్రామాః |
తం దదర్శ మహాతేజా స్తేజొవంతం మహాకపిః || 29
రావణొ౽యం మహాబాహురితి సంచింత్య వానరః |
అవప్లుతొ మహాతేజా హనుమాన్ మారుతాత్మజః || 30
స తథా ప్యుగ్రతేజా స్సన్నిర్ధూత స్తస్య తేజసా |
పత్రగుహ్యాంతరే సక్తొ హనుమాన్ సంవృతొ౽భవత్ || 31
స తామసితకేశాంతాం సుశ్రొణీం సంహతస్తనీమ్ |
దిదృక్షు రసితాపాంగా ముపావర్తత రావణః || 32
ఇత్యార్షే, శ్రీ మద్రామాయణే, వాల్మీకియే, ఆదికావ్యే, సుందరకాణ్డే, అష్టాదశః సర్గః