45 సర్గ
Download శుద్ద పాఠ్యం | Audio
తత స్తే రాక్షసేంద్రేణ చొదితా మంత్రిణ స్సుతాః |
నిర్యయు ర్భవనా త్తస్మాత్ సప్త సప్తార్చి వర్చసః || 1
మహాబల పరీవారా ధనుష్మంతొ మహాబలాః |
కృతాస్త్రాస్త్రవిదాం శ్రేష్ఠాః పరస్పర జయైషిణః || 2
హేమ జాల పరిక్షిప్తై ర్ధ్వజవద్భిః పతాకిభిః |
తొయద స్వన నిర్ఘొషై ర్వాజి యుక్తై ర్మహారథైః || 3
తప్త కాంచన చిత్రాణి చాపా న్యమిత విక్రమాః |
విష్పారయంతః సంహృష్టా స్తడిత్వంత ఇవాంబుదాః || 4
జనన్యస్తు తత స్తేషాం విదిత్వా కింకరాన్ హతాన్ |
బభూవు శ్శొక సంభ్రాంతా స్సబాంధవ సుహృజ్జనాః || 5
తే పరస్పర సంఘర్షాత్ తప్త కాంచన భూషణాః |
అభిపేతు ర్హనూమంతం తొరణస్థ మవస్థితమ్ || 6
సృజంతొ బాణ వృష్టిం తే రథ గర్జిత నిస్వనాః |
వృష్టిమంత ఇవాంభొదా విచేరు ర్నైరృతాంబుదా || 7
అవకీర్ణ స్తత స్తాభిర్హనూమాన్ శర వృష్టిభిః |
అభవత్ సంవృతాకార శ్శైల రాడివ వృష్టిభిః || 8
స శరాన్ మోఘయామాస తేషా మాశు చరః కపిః |
రథ వేగం చ వీరాణాం విచరన్ విమలే౽౦బరే || 9
స తైః క్రీడన్ ధనుష్మద్భి ర్వ్యొమ్ని వీరః ప్రకాశతే |
ధనుష్మద్భి ర్యథా మేఘై ర్మారుతః ప్రభురంబరే || 10
స కృత్వా నినదం ఘొరం త్రాసయం స్తాం మహాచమూమ్ |
చకార హనుమాన్ వేగం తేషు రక్షస్సు వీర్యవాన్ || 11
తలే నాభ్యహనత్ కాంశ్చిత్ పాదైః కాంశ్చిత్ పరం తపః |
ముష్టినా౽భ్యహనత్ కాంశ్చి న్నఖైః కాంశ్చిద్ వ్యదారయత్ || 12
ప్రమమా థోరసా కాంశ్చి దూరుభ్యా మపరాన్ కపిః |
కేచిత్తస్య నినాదేన తత్రైవ పతితా భువి || 13
తత స్తే ష్వవపన్నేషు భూమౌ నిపతితేషు చ |
తత్ సైన్య మగమత్ సర్వం దిశొ దశ భయర్దితమ్ || 14
వినేదు ర్విస్వరం నాగా నిపేతు ర్భువి వాజినః |
భగ్న నీడ ధ్వజచ్ఛత్రై ర్భూశ్చ కీర్ణా౽భవ ద్రథైః || 15
స్రవతా రుధిరేణాథ స్రవంత్యొ దర్శితాః పథి |
వివిధైశ్చ స్వరైర్లంకా ననాద వికృతం తదా || 16
స తాన్ ప్రవృద్ధాన్ వినిహత్య రాక్షసాన్ |
మహాబల శ్చండ పరాక్రమః కపిః |
యుయుత్సు రన్యైః పునరేవ రాక్షసైః |
స్తమేవ వీరొ౽భిజగామ తొరణమ్ || 17
ఇత్యార్షే శ్రీమద్రామాయణే, వాల్మీకియే, సుందరకాణ్డే పంచచత్వారింశః సర్గః