40 సర్గ
Download శుద్ద పాఠ్యం | Audio
శ్రుత్వా తు వచనం తస్య వాయు సూనొ ర్మహాత్మనః |
ఉవా చాత్మ హితం వాక్యం సీతా సుర సుతోపమా || 1
త్వాం దృష్ట్వా ప్రియ వక్తారం సంప్రహృష్యామి వానర |
అర్ధ సంజాత సస్యేవ వృష్టిం ప్రాప్య వసుం ధరా || 2
యథా తం పురుష వ్యాఘ్రం గాత్రై శ్శొకాభికర్శితైః |
సంస్పృశేయం సకామాహం తథా కురు దయాం మయి || 3
అభిఙ్ఞానం చ రామస్య దద్యా హరి గణోత్తమ |
క్షిప్తా మిషికాం కాకస్య కొపా దేకాక్షిశాతనీమ్ || 4
మన శ్శిలాయా స్తిలొకో గండ పార్శ్వే నివేశితః |
త్వయా ప్రణష్టే తిలకే తం కిల స్మర్తుమర్హసి || 5
స వీర్యవాన్ కథం సీతాం హృతాం సమనుమన్యసే |
వసంతీం రక్షసాం మధ్యే మహేంద్ర వరుణోపమః || 6
ఎష చూడా మణి ర్దివ్యొ మయా సుపరిరక్షితః |
ఎతం దృష్ట్వా ప్రహృష్యామి వ్యసనే త్వా మివానఘ || 7
ఎష నిర్యాతితః శ్రీమాన్ మయా తే వారి సంభవః |
అతః పరం న శక్ష్యామి జీవితుం శొక లాలసా || 8
అసహ్యాని చ దుఃఖాని వాచశ్చ హృదయచ్ఛిదః |
రాక్షసీనాం సుఘోరాణాం త్వత్ కృతే మర్షయా మహమ్ || 9
ధారయిష్యామి మాసం తు జీవితం శత్రు సూదన |
ఊర్ధ్వం మాసా న్న జీవిష్యే త్వయా హీనా నృపాత్మజ || 10
ఘొరొ రాక్షస రాజొ౽యం దృష్టిశ్చ న సుఖా మయి |
త్వాం చ శ్రుత్వా విషజ్జంతం న జీవేయ మహం క్షణమ్ || 11
వైదేహ్యా వచనం శ్రుత్వా కరుణం సాశ్రు భాషితమ్ |
తథాబ్రవీ న్మహాతేజా హనుమాన్ మారుతాత్మజః || 12
త్వ చ్ఛోక విముఖొ రామొ దేవి సత్యేన తే శపే |
రామే దుఃఖాభిభూతే తు లక్ష్మణః పరితప్యతే || 13
కథంచిత్ భవతీ దృష్టా న కాలః పరిశొచితుమ్ |
ఇమం ముహూర్తం దుఃఖానా మంతం ద్రక్ష్యసి భామిని || 14
తావుభౌ పురుష వ్యాఘ్రౌ రాజ పుత్రా వరిందమౌ |
త్వద్దర్శన కృతోత్సాహౌ లంకాం భస్మీ కరిష్యతః || 15
హత్వా తు సమరే క్రూరం రావణం సహ బాంధవమ్ |
రాఘవౌ త్వాం విశాలాక్షి స్వాం పురీం ప్రాపయిష్యతః || 16
యత్తు రామో విజానీయాదభిఙ్ఞాన మనిందితే |
ప్రీతి సంజననం తస్య భూయ స్త్వం దాతుమర్హసి || 17
సా౽బ్రవీ ద్దత్తమేవేతి మయా భిఙ్ఞాన ముత్తమమ్ |
ఎత దేవ హి రామస్య దృష్ట్వా మత్కేశ భూషణమ్ |
శ్రద్ధేయం హనుమన్ వాక్యం తవ వీర భవిష్యతి || 18
స తం మణి వరం గృహ్య శ్రీమాన్ ప్లవగ సత్తమః |
ప్రణమ్య శిరసా దేవీం గమనా యోపచక్రమే || 19
త ముత్పాతకృతోత్సాహ మవేక్ష్య హరి పుంగవమ్ |
వర్ధమానం మహావేగ మువాచ జనక ఆత్మజా |
అశ్రు పూర్ణ ముఖీ దీనా బాష్ప గద్గదయా గిరా || 20
హనూమన్ సింహాసంకాశౌ భ్రాతరౌ రామ లక్ష్మణౌ |
సుగ్రీవం చ సహామాత్యం సర్వాన్ బ్రూయా హ్యానామయమ్ || 21
యథా చ స మహాబాహు ర్మాం తారయతి రాఘవః |
అస్మా ద్దుఃఖాంబు సంరోధాత్ త్వం సమాధాతు మర్హసి || 22
ఇమం చ తీవ్రం మమ శొక వేగమ్ |
రక్షొభి రేభిః పరిభర్త్సనం చ |
బ్రూయాస్తు రామస్య గత స్సమీపమ్ |
శివశ్చతే౽ధ్వాస్తు హరి ప్రవీర || 23
స రాజ పుత్రా ప్రతివేదితార్థః |
కపిః కృతార్థః పరిహృష్ట చేతాః |
అల్పవశేషం ప్రసమీక్ష్య కార్యమ్ |
దిశం హ్యుదీచీం మనసా జగామ || 24
ఇత్యార్షే శ్రీమద్రామాయణే, వాల్మీకియే, సుందరకాణ్డే, చత్వారింశః సర్గః