42 సర్గ
Download శుద్ద పాఠ్యం | Audio
తతః పక్షి నినాదేన వృక్ష భంగ స్వనేన చ |
బభూవు స్త్రాస సంభ్రాంతాః సర్వే లంకా నివాసినః || 1
విద్రుతా శ్చ భయ త్రస్తా వినేదు ర్మృగ పక్షుణః |
రక్షసాం చ నిమిత్తాని క్రూరాణి ప్రతిపేదిరే || 2
తతొ గతాయాం నిద్రాయాం రాక్షస్యొ వికృతాననాః |
తద్వనం దదృశు ర్భగ్నం తం చ వీరం మహాకపిమ్ || 3
స తా దృష్ట్వా మహాబాహు ర్మహాసత్త్వొ మహాబలః |
చకార సుమహ ద్రూపం రాక్షసీనాం భయావహమ్ || 4
తతస్తం గిరి సంకాశ మతికాయం మహాబలమ్ |
రాక్షస్యొ వానరం దృష్ట్వా పప్రచ్ఛు ర్జనకాత్మజామ్ || 5
కొ౽యం కస్య కుతొ వాయం కిన్నిమిత్త మిహాగతః |
కథం త్వయా సహానేన సంవాదః కృత ఇత్యుత || 6
ఆచక్ష్వ నొ విశాలాక్షి మా భూత్తే సుభగే భయమ్ |
సంవాద మసితాపాంగే త్వయా కిం కృతవానయమ్ || 7
అథాబ్రవీత్తదా సాధ్వీ సీతా సర్వాంగ సుందరీ |
రక్షసాం భీమ రూపాణాం విఙ్ఞానే మమ కా గతిః || 8
యూయమే వాభి జానీత యో౽యం యద్వా కరిష్యతి |
అహి రేవ హ్యహేః పాదాన్ విజానాతి న సంశయః || 9
అహమ ప్యస్య భీతాస్మి నైనం జానామి కొన్వయమ్ |
వేద్మి రాక్షసమేవైనం కామ రూపిణ మాగతమ్ || 10
వైదేహ్యా వచనం శ్రుత్వా రాక్షస్యొ విద్రుతా ద్రుతమ్ |
స్థితాః కాశ్చి ద్గతాః కాశ్చిద్ రావణాయ నివేదితుమ్ || 11
రావణస్య సమీపే తు రాక్షస్యొ వికృతాననాః |
విరూపం వానరం భీమ మాఖ్యతు ముపచక్రముః || 12
అశొక వనికా మధ్యే రాజన్ భీమ వపుః కపిః |
సీతయా కృత సంవాదః స్తిష్ఠ త్యమిత విక్రమః || 13
న చ తం జానకీ సీతా హరిం హరిణ లొచణా |
అస్మాభి ర్బహుధా పృష్టా నివేదయితు మిచ్ఛతి || 14
వాసవస్య భవే ద్దూతొ దూతొ వైశ్రవణస్య వా |
ప్రేషితొ వాపి రామేణ సీతాన్వేషణ కాంక్షయా || 15
తేన త్వద్భూత రూపేణ యత్తత్ తవ మనొ హరమ్ |
నానా మృగ గణాకీర్ణం ప్రమృష్టం ప్రమదా వనమ్ || 16
న తత్ర కశ్చి దుద్దేశొ య స్తేన న వినాశితః |
యత్ర సా జానకీ సీతా స తేన న వినాశితః || 17
జానకీ రక్షణార్థం వా శ్రమా ద్వా నోపలభ్యతే |
అథవా కః శ్శ్రమ స్తస్య సైవ తేనాభిరక్షితా || 18
చారు పల్లవ పుష్పాఢ్యం యం సీతా స్వయ మాస్థితా |
ప్రవృద్ధః శింశపా వృక్షః స చ తేనాభిరక్షితః || 19
తస్యోగ్ర రూపస్యోగ్ర! త్వం దణ్డ మాఙ్ఞాతు మర్హసి |
సీతా సంభాషితా యేన తద్వనం చ వినాశితమ్ || 20
మనః పరిగృహీతాం తాం తవ రక్షో గణేశ్వర |
క స్సీతా మభిభాషేత యో న స్యాత్ త్యక్త జీవితః || 21
రాక్షసీనాం వచః శ్రుత్వా రావణొ రాక్షసేశ్వరః |
హుతాగ్ని రివ జజ్వాల కొప సంవర్తితేక్షణః || 22
తస్య క్రుద్ధస్య నేత్రాభ్యాం ప్రాపతన్నస్రబిందవః |
దీప్తాభ్యామివ జజ్వాల కొపసంవర్తితేక్షణః || 23
ఆత్మన స్సదృశాన్ శూరాన్ కింకరా న్నామ రాక్షసాన్ |
వ్యాదిదేశ మహాతేజా నిగ్రహార్థం హనూమతః || 24
తేషా మశీతి సాహస్రం కింకరాణాం తరస్వినామ్ |
నిర్యయు ర్భవనా త్తస్మాత్ కూటముద్గర పాణయః || 25
మహోదరా మహాదంష్ట్రా ఘొర రూపా మహాబలాః |
యుద్ధాభిమనస స్సర్వే హనూమద్గ్రహణోద్యతాః || 26
తే కపిం తం సమాసాద్య తొరణస్థ మవస్థితమ్ |
అభిపేతు ర్మహావేగాః పతంగా ఇవ పావకమ్ || 27
తే గదాభి ర్విచిత్రాభిః పరిఘైః కాంచనాంగదైః |
ఆజఘ్ను ర్వానర శ్రేష్ఠం శరై శ్చాదిత్య సమ్నిభైః || 28
ముద్గరైః పట్టిసైః శ్శూలైః ప్రాసతొమరశక్తిభిః |
పరివార్య హనూమంతం సహసా తస్థు రగ్రతః || 29
హనూమానపి తేజస్వీ శ్రీమాన్ పర్వత సన్నిభః |
క్షితా వావిధ్య లాంగూలం ననాద చ మహాస్వనమ్ || 30
స భూత్వా సుమహాకాయో హనుమాన్ మారుతాత్మజః |
ధృష్టమాస్ఫొటయామాస లంకాం శబ్దేన పూరయన్ || 31
తస్యస్ఫొటితశబ్దేన మహతా సానునాదినా |
పేతు ర్విహంగా గగనా దుచ్చై శ్చేద మఘోషయత్ || 32
జయత్యతిబలొ రామో లక్ష్మణశ్చ మహాబలః |
రాజా జయతి సుగ్రీవొ రాఘవేణాభిపాలితః || 33
దాసొ౽హం కొసలేంద్రస్య రామస్యాక్లిష్టకర్మణః |
హనుమాన్ శత్రుసైన్యానాం నిహంతా మారుతాత్మజః || 34
న రావణసహస్రం మే యుద్ధే ప్రతిబలం భవేత్ |
శిలాభిస్తు ప్రహరతః పాదపైశ్చ సహస్రశః || 35
అర్దయిత్వా పురీం లంకా మభివాద్య చ మైథిలీమ్ |
సమృద్ధార్థొ గమిష్యామి మిషతాం సర్వరక్షసామ్ || 36
తస్య సన్నాద శబ్దేన తే౽భవన్ భయ శంకితాః |
దదృశుశ్చ హనూమంతం సంధ్యా మేఘ మివోన్నతమ్ || 37
స్వామి సందేశ నిహ్శంకా స్తత స్తే రాక్షసాః కపిమ్ |
చిత్రైః ప్రహరణై ర్భీమై రభిపేతు స్తత స్తతః || 38
స తైః పరివృతః శూరై స్సర్వత స్స మహాబలః |
ఆససాద౽౽యసం భీమం పరిఘం తొరణాశ్రితమ్ || 39
స తం పరిఘ మాదాయ జఘాన రజనీ చరాన్ |
స పన్నగ మివాదాయ స్ఫురంతం వినతా సుతః |
విచచారాంబరే వీరః పరిగృహ్య చ మారుతిః || 40
స హత్వా రాక్షసాన్ వీరాన్ కింకరాన్ మారుతాత్మజః |
యుద్ధ కాంక్షీ పున ర్వీర స్తొరణం సముపాశ్రితః ||
తత స్తస్మా ద్భయా న్ముక్తాః కతిచిత్ తత్ర రాక్షసాః |
నిహతాన్ కింకరాన్ సర్వాన్ రావణాయ న్యవేదయన్ |
స రాక్షసానాం నిహతం మహాద్బలమ్ |
నిశమ్య రాజా పరివృత్త లొచనః |
సమాదిదే శాప్రతిమం పరాక్రమే |
ప్రహస్త పుత్రం సమరే సుదుర్జయమ్ || 43
ఇత్యార్షే శ్రీమద్రామాయణే, వాల్మీకియే, సుందరకాణ్డే ద్విచత్వారింశః సర్గః