41 సర్గ
Download శుద్ద పాఠ్యం | Audio
స చ వాగ్భిః ప్రశస్తాభి ర్గమిష్యన్ పూజిత స్తయా |
తస్మా ద్దేశా దపక్రమ్య చింతయామాస వానరః || 1
అల్ప శేష మిదం కార్యం దృష్టేయ మసితేక్షణా |
త్రీ నుపాయా నతిక్రమ్య చతుర్థ ఇహ దృశ్యతే || 2
న సామ రక్షహ్సు గుణాయ కల్పతే |
న దన మార్థోపచితేషు యుజ్యతే |
న భేద సాధ్యా బల దర్పితా జనాః |
పరాక్రమ స్త్వేవ మమేహ రొచతే || 3
న చాస్య కార్యస్య పరాక్రమాదృతే |
వినిశ్చయః కశ్చి దిహోపపద్యతే |
హత ప్రవీరా హి రణే హి రాక్షసాః |
కథంచిదీయు ర్యదిహాద్య మార్దవమ్ || 4
కార్యే కర్మణి నిర్దిష్టే యొ బహూన్యపి సాధయేత్ |
పూర్వ కార్య విరొధేన స కార్యం కర్తు మర్హతి || 5
స హ్యేక స్సాధకొ హేతుః స్వల్ప స్యాపీహ కర్మణః |
యో హ్యర్థం బహుధా వేద స సమర్థొ౽ర్థ సాధనే || 6
ఇహైవ తావత్ కృత నిశ్చయో హ్యహం |
యది వ్రజేయం ప్లవగేశ్వరాలయమ్ |
పరాత్మ సమ్మర్ద విశేష తత్త్వవిత్ |
తతః కృతం స్యా న్మమ భర్తృ శాసనమ్ || 7
కథం ను ఖల్వద్య భవేత్సుఖాగతం |
ప్రసహ్య యుద్ధం మమ రాక్షసై స్సహ |
తథైవ ఖల్వాత్మ బలం చ సారవత్ |
సమానయేన్మాం చ రణే దశాననః || 8
తతస్సమాసాద్య రణే దశాననం |
సమంత్రివర్గం సబలప్రయాయినమ్ |
హృది స్థితం తస్య మతం బలం చ వై |
సుఖేన మత్త్వాహమితః పునర్వ్రజే || 9
ఇద మస్య నృశంసస్య నందనోపమ ముత్తమమ్ |
వనం నేత్ర మనః కాంతం నానా ద్రుమ లతా యుతమ్ || 10
ఇదం విధ్వంసయిష్యామి శుష్కం వన మివానలః |
అస్మిన్ భగ్నే తతః కొపం కరిష్యతి దశాననః || 11
తతొ మహత్ సాశ్వ మహారథ ద్విపం |
బలం సమాదేక్ష్యతి రాక్షసాధిపః |
త్రిశూల కాలాయసపట్టి సాయుధం |
తతొ మహద్యుద్ధ మిదం భవిష్యతి || 12
అహం తు తై స్సంయతి చండ విక్రమై |
స్సమేత్య రక్షొభి రసహ్య విక్రమః |
నిహత్య తద్రావణ చొదితం బలం |
సుఖం గమిష్యామి కపీశ్వరాలయమ్ || 13
తతొ మారుతవత్ క్రుద్ధొ మారుతి ర్భీమ విక్రమః |
ఊరు వేగేన మహతా ద్రుమాన్ క్షేప్తు మథారభత్ || 14
తతస్తు హనుమాన్ వీరొ బభంజ ప్రమదావనమ్ |
మత్త ద్విజ సమాఘుష్టం నానా ద్రుమ లతా యుతమ్ || 15
తద్వనం మథితై ర్వృక్షై ర్భిన్నై శ్చ సలిలాశయైః |
చూర్ణితైః పర్వతాగ్రై శ్చ బభూ వాప్రియ దర్శనమ్ || 16
నానాశకుంతవిరుతైః ప్రభిన్నై స్సలిలాశయైః |
తామ్రైః కిలసయైః క్లాంతైః క్లాంతద్రుమలతాయితమ్ |
న బభౌ తద్వనం తత్ర దావానలహతం యథా || 17
వ్యాకులావరణా రేజు ర్విహ్వలా ఇవ తా లతాః || 18
లతా గృహై శ్చిత్ర గృహై శ్చ నాశితై |
ర్మహోరగై ర్వ్యాళమృగైశ్చ నిర్ధుతైః |
శిలా గృహైరున్మథితై స్తథా గృహైః |
ప్రణష్ట రూపం తదభూన్మహద్వనమ్ || 19
సా విహ్వలా శొకలతాప్రతానా |
వనస్థలీ శొకలతాప్రతానా |
జాతా దశాస్యప్రమదావనస్య |
కపేర్బలాద్ధి ప్రమదావనస్య || 20
స తస్య కృత్వార్థ పతేర్మహా కపి |
ర్మహ ద్వ్యళీకం మనసొ మహాత్మనః |
యుయుత్సు రేకో బహుభి ర్మహాబలైః |
శ్రియా జ్వలన్ తొరణ మాశ్రితః కపిః || 21
ఇత్యార్షే శ్రీమద్రామాయణే, వాల్మీకియే, సుందరకాణ్డే ఎకచత్వారింశః సర్గః