అష్టమ సర్గ
Download శుద్ద పాఠ్యం | Audio
స తస్య మధ్యే భవనస్య సంస్థితం, మహద్విమానం మణివజ్రచిత్రితమ్ |
ప్రతప్తజాంబూనదజాలకృత్రిమం, దదర్శ వీరః పవనాత్మజః కపిః || 1
త దప్రమేయా ప్రతికారకృత్రిమం, కృతం స్వయం సాధ్వితి విశ్వకర్మణా |
దివం గతం వాయుపథప్రతిష్ఠితం, వ్యరాజతా౽౽దిత్యపథస్య లక్ష్మివత్ || 2
న తత్ర కించి న్న కృతం ప్రయత్నతొ, న తత్ర కించి న్న మహర్హరత్నవత్ |
న తే విశేషా నియతా సురేష్వపి, న తత్ర కించిన్న మహావిశేషవత్ || 3
తపస్సమాధానపరాక్రమార్జితం, మన స్సమాధానవిచారచారిణమ్ |
అనేకసంస్థానవిశేషనిర్మితం, తత స్తత స్తుల్యవిశేషదర్శనమ్ || 4
మన స్సమాధాయ తు శీఘ్రగామినం, దురావరం మారుతతుల్యగామినం |
మహాత్మనాం పుణ్యకృతాం మహర్ధినాం, యశస్వినా మగ్ర్యముదా మివాలయం || 5
విశేష మాలంబ్య విశేషసంస్థితం, విచిత్రకూటం బహుకూటమండితం |
మనొ౽భిరామం శరదిందునిర్మలం, విచిత్రకూటం శిఖరం గిరే ర్యథా || 6
వహంతి యం కుండశొభితాననా, మహాశనా వ్యొమచరా నిశాచరాః |
వివృత్తవిధ్వస్తవిశాలలొచనా, మహాజవా భూతగణా స్సహస్రశః || 7
వసంతపుష్పొత్కరచారుదర్శనం, వసంతమాసదపి కాంతదర్శనమ్ |
స పుష్పకం తత్ర విమానముత్తమం, దదర్శ తద్వానరవీరసత్తమః || 8
ఇత్యార్షే, శ్రీ మద్రామాయణే, వాల్మీకియే, ఆదికావ్యే, సుందరకాండే,అష్టమః సర్గః