21 సర్గ
Download శుద్ద పాఠ్యం | Audio
తస్య తద్వచనం శ్రుత్వా సీతా రౌద్రస్య రక్షసః |
ఆర్తా దీనస్వరా దీనం ప్రత్యువాచ శనై ర్వచః || 1
దుఃఖార్తా రుదతీ సీతా వేపమానా తపస్వినీ |
చింతయంతీ వరారొహ పతిమేవ పతివ్రతా |
తృణ మంతరతః కృత్వా ప్రత్యువాచ శుచిస్మితా || 2
నివర్తయ మనొ మత్తః స్వజనే క్రియతాం మనః |
న మాం ప్రార్థయితుం యుక్తం సుసిద్ధిమివ పాపకృత్ || 3
అకార్యం న మయా కార్య మేకపత్న్యా విగర్హితమ్ |
కులం సంప్రాప్తయా పుణ్యం కులే మహతి జాతయా || 4
ఎవ ముక్త్వా తు వైదేహీ రావణం తం యశస్వినీ |
రాక్షసం పృష్ఠతః కృత్వా భూయో వచన మబ్రవీత్ || 5
నాహ మౌపయికీ భార్యా పరభార్యా సతీ తవ |
సాధు ధర్మ మవేక్షస్వ సాధు సాధువ్రతం చర || 6
యథా తవ తథాన్యేషాం దారా రక్ష్యా నిశాచర |
ఆత్మానముపమాం కృత్వా స్వేషు దారేషు రమ్యతామ్ || 7
అతుష్టం స్వేషు దారేషు చపలం చలితేంద్రియమ్ |
నయంతి నికృతిప్రజ్ఙం పరదారాః పరాభవమ్ || 8
ఇహ సంతొ న వా సంతి సతొ వా నానువర్తసే |
తథా హి విపరీతా తే బుద్ధి రాచారవర్జితా || 9
వచొ మిథ్యాప్రణీతాత్మా పథ్యముక్తం విచక్షణైః |
రాక్షసానా మభావాయ త్వం వా న వ్రతిపద్యసే || 10
ఆకృతాత్మాన మాసాద్య రాజాన మనయే రతమ్ |
సమృద్ధాని వినశ్యంతి రాష్ట్రాణి నగరాణి చ || 11
తథేయం త్వాం సమాసాద్య లంకా రత్నౌఘసంకులా |
అపరాధా త్తవైకస్య నచిరా ద్వినశిష్యతి || 12
స్వకృతై ర్హన్యమానస్య రావణాదీర్ఘదర్శినః |
అభినందంతి భూతాని వినాశే పాపకర్మణః || 13
ఎవం త్వాం పాపకర్మాణం వక్ష్యంతి నికృతా జనాః |
దిష్ట్యైతద్ వ్యసనం ప్రాప్తొ రౌద్ర ఇత్యేవ హర్షితాః || 14
శక్యా లొభయితుం నాహ మైశ్వర్యేణ ధనేన వా |
అనన్యా రాఘవేణాహం భాస్కరేణ ప్రభా యథా || 15
ఉపధాయ భుజం తస్య లొకనాథస్య సత్కృతమ్ |
కథం నామోపధాస్యామి భుజమన్యస్య కస్య చిత్ || 16
అహమౌపయీకీ భార్యా తస్యైవ వసుధాపతేః |
వ్రతస్నాతస్య విప్రస్య విద్యేవ విదితాత్మనః || 17
సాధు రావణ రామేణ మాం సమానయ దుఃఖితామ్ |
వనే వాశితయా సార్థం కరేణ్వేవ గజాధిపమ్ || 18
మిత్రమౌపయికం కర్తుం రామః స్థానం పరీప్సతా |
వధం చానిచ్ఛతా ఘొరం త్వయా౽సౌ పురుషర్షభః || 19
విదిత స్స హి ధర్మజ్ఙ శ్శరణాగతవత్సలః |
తేన మైత్రీ భవతు తే యది జీవితుమిచ్చసి || 20
ప్రసాదయస్వ త్వం చైనం శరణాగతవత్సలమ్ |
మాం చాస్మై ప్రయతొ భూత్వా నిర్యాతయితుమర్హసి || 21
ఎవం హి తే భవేత్ స్వస్తి సంప్రదాయ రఘూత్తమే |
అన్యథా త్వం హి కుర్వాణొ వధం ప్రాప్స్యసి రావణ || 22
వర్జయే ద్వజ్ర ముత్సృష్టం వర్జయే దంతక శ్చిరమ్ |
త్వద్విధం తు న సంక్రుద్ధొ లొకనాథ స్స రాఘవః || 23
రామస్య ధనుష శ్శబ్దం శ్రొష్యసి త్వం మహాస్వనమ్ |
శతక్రతువిసృష్టస్య నిర్ఘొష మశనే రివ || 24
ఇహ శీఘ్రం సుపర్వాణొ జ్వలితాస్య ఇవొరగాః |
ఇషవొ నిపతిష్యంతి రామలక్ష్మణలక్షణాః || 25
రక్షాంసి పరినిఘ్నంతః పుర్యా మస్యాం సమంతతః |
అసంపాతం కరిష్యంతి పతంతః కంకవాససః || 26
రాక్షసేంద్రమహాసర్పాన్ స రామగరుడొ మహాన్ |
ఉద్ధరిష్యతి వేగేన వైనతేయ ఇవొరగాన్ || 27
అపనేష్యతి మాం భర్తా త్వత్తశ్శీఘ్ర మరిందమః |
అసురేభ్యః శ్రియం దీప్తాం విష్ణుస్త్రిభిరివ క్రమైః || 28
జనస్థానే హతస్థానే నిహతే రక్షసాం బలే |
అశక్తేన త్వయా రక్షః కృతమేత దసాధు వై || 29
అశ్రమం తు తయో శ్శూన్యం ప్రవిశ్య నరసింహయొః |
గొచరం గతయొ ర్ర్భాత్రొ రపనీతా త్వయాధమ || 30
న హి గంధ ముపాఘ్రాయ రామలక్ష్మణయో స్త్వయా |
శక్యం సందర్శనే స్థాతుం శునా శార్దూలయో రివ || 31
తస్య తే విగ్రహే తాభ్యాం యుగగ్రహణ మస్థిరమ్ |
వృత్రస్యే వేంద్రబాహుభ్యాం బాహొ రేకస్య నిగ్రహః || 32
క్షిప్రం తవ స నాథొ మే రామ స్సౌమిత్రిణా సహ |
తొయ మల్ప మివాదిత్యః ప్రాణా నాదాస్యతే శరైః || 33
గిరిం కుబేరస్య గతొ౽థ వా |
సభాం గతొ వా వరుణస్య రాజ్ఙః |
అసంశయం దాశరథే ర్న మొక్ష్యసే |
మహాద్రుమః కాలహతొ౽శనేరివ || 34
ఇత్యార్షే, శ్రీ మద్రామాయణే, వాల్మీకియే, ఆదికావ్యే, సుందరకాణ్డే, ఎకవింశః సర్గః