27 సర్గ
Download శుద్ద పాఠ్యం | Audio
ఇత్యుక్తాహ్ సీతయా ఘొరా రాక్షస్యః క్రొధమూర్ఛితాః |
కాశ్చి జ్జగ్ముస్తదాఖ్యాతుం రావణస్య తరస్వినః || 1
తతః సీతా ముపాగమ్య రాక్షస్యొ ఘొరదర్శనాః |
పునః పురుష మేకార్థ మనర్థార్థ మథాబ్రువన్ || 2
అద్యేదానీం తవానార్యే సీతే పాపవినిశ్చయే |
రాక్షస్యొ భక్షయిష్యంతి మాంసమేత ద్యథాసుఖం || 3
సీతాం తాభి రనార్యాభి ర్దృష్ట్వా సంతర్జితాం తదా |
రాక్షసీ త్రిజటా వృద్ధా శయానా వాక్యమబ్రవీత్ || 4
ఆత్మానం ఖాద తానార్యా న సీతాం భక్షయిష్యథ |
జనకస్య సుతామిష్టాం సున్నషాం దశరథస్య చ || 5
స్వప్నొ హ్యద్య మయా దృష్టొ దారుణో రొమహర్షణః |
రాక్షసానా మభావాయ భర్తురస్యా భవాయ చ || 6
ఎవ ముక్తా స్త్రిజటయా రాక్షస్యః క్రొధమూర్ఛితాః |
సర్వా ఎవాబ్రువన్ భీతా స్త్రిజటాం తా మిదం వచః |
కథయస్వ త్వయా దృష్టః స్వప్నొ౽యం కీదృశొ నిశి || 7
తాసాం శ్రుత్వా తు వచనం రాక్షసీనాం ముఖాచ్య్చుతమ్ |
ఉవాచ వచనం కాలే త్రిజటా స్వప్నసంశ్రితమ్ || 8
గజదంతమయీం దివ్యాం శిబికామంతరిక్షగామ్ |
యుక్తాం హంససహ్రేణ స్వయ మాస్థాయ రాఘవః |
శుక్లమాల్యాంబరధరొ లక్ష్మణేన సహాగతః || 9
స్వప్నే చాద్య మయా దృష్టా సీతా శుక్లాంబరావృతా |
సాగరేణ పరిక్షిప్తం స్వేతం పర్వతమాస్థితా |
రామేణ సంగతా సీతా భాస్కరేణ ప్రభా యథా || 10
రాఘవశ్చ మయా దృష్ట శ్చతుర్దంష్ట్రం మహాగజమ్ |
ఆరూఢ శ్శైలసంకాశం చచార సహ లక్ష్మణః || 11
తతస్తౌ నరశార్దూలౌ దీప్యమానౌ స్వతేజసా |
శుక్లమాల్యాంబరధరౌ జానకీం పర్యుపస్థితౌ || 12
తతస్తస్య నగస్యాగ్రే హ్యాకాశస్థస్య దంతినః |
భర్త్రా పరిగృహీతస్య జానకీ స్కంధ మాశ్రితా || 13
భర్తు రంకాత్ సముత్పత్య తతః కమలలొచనా |
చంద్రసూర్యౌ మయా దృష్టా పాణినా పరిమార్జతీ || 14
తతస్తాభ్యాం కుమారాభ్యామాస్థితః స్స గజొత్తమః |
సీతయా చ విశాలాక్ష్యా లంకాయా ఉపరి స్థితః || 15
పాణ్డురర్షభయుక్తేన రథే నాష్టయుజా స్వయమ్ |
ఇహొపయాతః కాకుత్‍స్థ సీతయా సహ భార్యయా || 16
లక్ష్మణేన సహ భ్రాత్రా సీతయా సహ వీర్యవాన్ |
ఆరుహ్య పుష్పకం దివ్యం విమానం సూర్యసన్నిభమ్ |
ఉత్తరాం దిశమాలొక్య జగామ పురుషోత్తమః || 17
ఎవం స్వప్నే మయా దృష్టొ రామొ విష్ణుపరాక్రమః |
లక్ష్మణేన సహ భ్రాత్రా సీతయా సహ భార్యయా || 18
న హి రామొ మహాతేజా శొక్యొ జేతుం సురాసురైః |
రాక్షసై ర్వాపి చాన్యై ర్వా స్వర్గః పాపజనై రివ || 19
రావణశ్చ మయా దృష్టః క్షితౌ తైలసముక్షితః |
రక్తవాసాః పిబన్ మత్తః కరవీరకృతస్రజః || 20
విమానాత్ పుష్పకా దద్య రావణః పతితొ భువి |
కృష్యమాణః స్త్రియా దృష్టొ ముండః కృష్ణాంబరః పునః || 21
రథేన ఖరయుక్తేన రక్తమాల్యానులేపనః |
పిబం స్తైలం హసన్ నృత్యన్ భ్రాంతచిత్తాకులేంద్రియః |
గర్దభేన యయౌ శీగ్రం దక్షిణాం దిశమాస్థితః || 22
పునరేవ మయా దృష్టొ రావణొ రాక్షసేశ్వరః |
పతితొ౽వాక్ఛిరా భూమౌ గర్దభా ద్భయమొహితః || 23
సహసొత్థాయ సంభ్రాంతొ భయార్తొ మదవిహ్వలః |
ఉన్మత్త ఇవ దిగ్వాసా దుర్వాక్యం ప్రలపన్ బహు || 24
దుర్గంధం దుస్సహం ఘొరం తిమిరం నరకొపమమ్ |
మలపంకం ప్రవిశ్యాశు మగ్నస్తత్ర స రావణః || 25
కంఠే బద్ధ్వా దశగ్రీవం ప్రమదా రక్తవాసినీ |
కాలీ కర్దమలిప్తాంగీ దిశం యామ్యాం ప్రకర్షతి || 26
ఎవం తత్ర మయా దృష్టః కుంభకర్ణొ నిశాచరః |
రావణస్య సుతా సర్వే దృష్టా స్తైలసముక్షితాః || 27
వరాహేణ దశగ్రీవ శింశుమారేణ చేంద్రజిత్ |
ఉష్ట్రేణ కుంభకర్ణశ్చ ప్రయాతా దక్షిణాం దిశమ్ || 28
ఎకస్తత్ర మయా దృష్టః శ్వేతచ్ఛత్రొ విభీసణః |
శుక్లమాల్యాంబరధరః శుక్లగంధానులేపనః || 29
శంఖదుందుభినిర్ఘొషైః నృత్తగీతై రలంకృతః |
ఆరుహ్య శైలసంకాశం మేఘస్తనితనిస్వనమ్ || 30
చతుర్ధంతం గజం దివ్యమాస్తే తత్ర విభీషణః |
చతుర్భి సచివై సార్ధం వైహాయస ముపస్థితః || 31
సమాజశ్చ మయా దృష్టొ గీతవాదిత్రనిస్వనః |
పిబతాం రక్తమాల్యానాం రక్షసాం రక్తవాససామ్ || 32
లంకా చేయం పురీ రమ్యా సవాజిరథకుంజరా |
సాగరే పతితా దృష్టా భగ్నగొపురతొరణా || 33
లంకా దృష్టా మయా స్వప్నే రావణేనాభిరక్షితా |
దగ్ధా రామస్య దూతేన వానరేణ తరస్వినా || 34
పీత్వా తైలం ప్రనృత్తాశ్చ ప్రహసంత్యొ మహాస్వనాః |
లంకాయాం భస్మరూక్షాయాం ప్రవైష్టా రాక్షస స్త్రీయః || 35
కుంభకర్ణాదయ శ్చేమే సర్వే రాక్షసపుంగవాః |
రక్తం నివసనం గృహ్య ప్రవిష్టా గొమయహ్రదే || 36
అపగచ్ఛత నశ్యధ్వం సీతా మాప స రాఘవః |
ఘాతయేత్ పరమామర్షీ సర్వై సార్ధం హి రాక్షసైః || 37
ప్రియాం బహుమతాం భార్యాం వనవాసమనువ్రతామ్ |
భర్త్సితాం తర్జితాం వాపి నానుమంస్యతి రాఘవః || 38
తదలం క్రూరవాక్యై ర్వ సాంత్వ మే వాభిధీయతామ్ |
అభియాచామ వైదేహీ మేతద్ధి మమ రొచతే || 39
యస్యా మేవంవిధః స్వప్నొ దుఃఖితాయాం ప్రదృశ్యతే |
సా దుఃఖై ర్వివిధై ర్ముక్తా ప్రియం ప్రాప్నొ త్యనుత్తమమ్ || 40
భర్త్సితామపి యాచధ్వం రాక్సస్యః కిం వివక్షయా |
రాఘవాద్ధి భయం ఘొరం రాక్షసానా ముపస్థితమ్ || 41
ప్రణిపాతప్రసన్నా హి మైథిలీ జనకాత్మజా |
అల మేషా పరిత్రాతుం రాక్షస్యొ మహాతొ భయాత్ || 42
అపి చాస్యా విశాలాక్ష్యా న కించిదుపలక్షయే |
విరూపమపి చాంగేషు సుసూక్ష్మమపి లక్షణమ్ || 43
చాయావైగుణ్యమాత్రం తు శంకే దుఃఖ ముపస్థితమ్ |
అదుఃఖార్హమిమాం దేవీం వైహాయస ముపస్థితామ్ || 44
అర్థసిద్ధిం తు వైదేహ్యాః పశ్యా మ్యహ ముపస్థితామ్ |
రాక్షసేంద్రవినాశం చ విజయం రాఘవస్య చ || 45
నిమిత్తభూత మేతత్తు శ్రొతు మస్యా మహత్ ప్రియమ్ |
దృశ్యతే చ స్ఫురచ్చక్షుః పద్మపత్ర మివాయతమ్ || 46
ఈషచ్చ హృషితొ వాస్యా దక్షిణాయా హ్యదక్షిణః |
అకస్మాదేవ వైదేహ్యా బహురేకః ప్రకంపతే || 47
కరేణుహస్తప్రతిమ సవ్య శ్చొరు రనుత్తమః |
వేపమాన సూచయతి రాఘవం పురతః స్థితమ్ || 48
పక్షీ చ శాఖానిలయః ప్రహృష్టః |
పునః పునశ్చొత్తమసాంత్వవాదీ |
సుస్వాగతం వాచముదీరయానః |
పునః పునశ్చొదయతీవ హృష్టః || 49
ఇత్యార్షే శ్రీమద్రామాయణే వాల్మీకియే, ఆదికావ్యే, సుందరకాణ్డే సప్తవింశః సర్గః