29 సర్గ
Download శుద్ద పాఠ్యం | Audio
తథా గతాం తాం వ్యథితాం అనిందితాం, |
వ్యపేత హర్షాం పరిదీన మానసామ్, |
శుభాం నిమిత్తాని శుభాని భేజిరే, |
నరం శ్రియా జుష్ట మివోపజీవినః || 1
తస్యా శుభం వామం అరాల పక్ష్మ, |
రాజీవృతం కృష్ణ విశాల శుక్లమ్, |
ప్రాస్పందత ఎకం నయనం సుకేశ్యా, |
మీన ఆహతం పద్మామివ అభితామ్రమ్ || 2
భుజ శ్చ చార్వంచిత పీన వృత్తః, |
పర అర్ధ్య కాలాగురు చందనార్హః, |
అనుత్తమేనాధ్యుషితః ప్రియేణ, |
చిరేణ వామ స్సమవేపతాశు || 3
గజేంద్రహస్త ప్రతిమశ్చ పీన, |
స్తయొర్ద్వయొ సంహతయో స్సుజాతః, |
ప్రస్పందమానః పున రూరురస్యా, |
రామం పురస్తాత్ స్థితమాచచక్షే || 4
శుభం పునర్హేమ సమాన వర్ణ, |
మీషద్రజొ ధ్వస్త మివామలాక్ష్యాః, |
వాసః స్థితాయాః శ్శిఖర అగ్ర దంత్యాః, |
కించిత్ పరిస్రంసత చారు గాత్ర్యాః || 5
ఎతై ర్నిమిత్తై రుపరైశ్చ సుభ్రూ, |
స్సంబొధితా ప్రాగాపి సాధు సిద్ధైః, |
వాతాతపక్లాంత మివ ప్రణష్టం, |
వర్షేణ బీజం ప్రతిసంజహర్ష || 6
తస్యాః పునః బింబ ఫలాధరోష్ఠం, |
స్వక్షి భ్రు కేశాంత మరాళ పక్ష్మ, |
వక్త్రం బభాసే సిత శుక్ల దంష్ట్రం |
రాహొ ర్ముఖాచ్చంద్ర ఇవ ప్రముక్తః || 7
సా వీత శొకా వ్యపనీత తంద్రీ, |
శాంత జ్వరా హర్ష వివృద్ధ సత్త్వా, |
అశొభతార్యా వదనేన శుక్లే, |
శీతాంశునా రాత్రిరివోదితేన || 8
ఇత్యార్షే శ్రీమద్రామాయణే, వాల్మీకియే, ఆదికావ్యే, సుందరకాణ్డే ఎకొనత్రింశః సర్గః