19 సర్గ
Download శుద్ద పాఠ్యం | Audio
తస్మిన్నేవ తతః కాలే రాజపుత్రీ త్వనిందితా |
రూపయౌవనసంపన్నం భూషణొత్తమభూషితం || 1
తతొ దృష్ట్వైవ వైదేహీ రావణం రాక్షసాధిపమ్ |
ప్రావేపత వరారొహా ప్రవాతే కదలీ యథా || 2
ఆచ్ఛాద్యొదర మూరుభ్యాం బాహుభ్యాం చ పయొధరౌ |
ఉపవిష్టా విశాలాక్షీ రుదంతీ వరవర్ణినీ || 3
దశగ్రీవస్తు వైదేహీం రక్షితాం రాక్షసీగణైః |
దదర్శ సీతాం దుఃఖార్తాం నావం సన్నామివార్ణవే || 4
అసంవృతాయా మాసీనాం ధరణ్యాం సంశితవ్రతామ్ |
చిన్నాం ప్రపతితాం భూమౌ శాఖామివ వనస్పతేః || 5
మలమండనచిత్రాంగీం మండనార్హా మమండితామ్ |
మృణాళీ పంకదిగ్ధేవ విభాతి న విభాతి చ || 6
సమీపం రాజసింహస్య రామస్య విదితాత్మనః |
సంకల్పహయసంయుక్తై ర్యాంతీ మివ మనొరథైః || 7
శుష్యంతీం రుదతీ మేకాం ధ్యానశొకపరాయణామ్ |
దుఃఖస్యాంత మపశ్యంతీం రామాం రామమనువ్రతామ్ || 8
వేష్టమానాం తథా౽౽ విష్టాం పన్నగేంద్రవధూమివ |
ధూప్యమానాం గ్రహేణేవ రొహిణీం ధూమకేతునా || 9
వృత్తశీలకులే జాతా మాచారవతి ధార్మికే |
పున స్సంస్కారమాపన్నాం జాతామివ చ దుష్కులే || 10
అభూతే నాపవాదేన కీర్తీం నిపతితామివ |
అమ్నాయానా మయోగేన విద్యాం ప్రశిథిలామివ || 11
సన్నామివ మహాకీర్తిం శ్రద్ధామివ విమానితామ్ |
ప్రజ్ఙామివ పరిక్షీణా మాశాం ప్రతిహతా మివ || 12
ఆయతీ మివ విధ్వస్తా మాజ్ఞాం ప్రతిహతామివ |
దీప్తామివ దిశం కాలే పూజా మపహృతామివ || 13
పద్మినీమివ విధ్వస్తాం హతశూరాం చమూ మివ |
ప్రభా మివ తమోధ్వస్తా ముపక్షీణా మివాపగాం || 14
వేదీమివ పరామృష్టాం శాంతా మగ్నిశిఖామివ |
పౌర్ణమాసీ మివ నిశాం రాహుగ్రస్తేందు మండలాం || 15
ఉత్కృష్టపర్ణకమలాం విత్రాసితవిహంగమామ్ |
హస్తిహస్తపరామృష్ట మాకులాం పద్మినీమివ || 16
పతిశొకాతురాం శుష్కాం నదీం విస్రావితామివ |
పరయా మృజయా హీనాం కృష్ణపక్షనిశా మివ || 17
సుకుమారీం సుజాతాంగీం రత్న గర్భగృహొచితామ్ |
తప్యమానా మివొష్ణేన మృణాలీ మచిరొద్ధృతాం || 18
గృహీతా మాళితాం స్తంభే యూథపేన వినాకృతామ్ |
నిశ్శ్వసంతీం సుదుఃఖార్తాం గజరాజవధూమివ || 19
ఎకయా దీర్ఘయా వేణ్యా శొభమానామయత్నతః |
నీలయా నీరదాపాయే వనరాజ్యా మహీమివ || 20
ఉపవాసేన శొకేన ధ్యానేన చ భయేన చ |
పరిక్షీణాం కృశాం దీనా మల్పాహారాం తపొధనామ్ || 21
ఆయాచమానాం దుఃఖార్తాం ప్రాంజలిం దేవతామివ |
భావేన రఘుముఖ్యస్య దశగ్రీవపరాభవం || 22
సమీక్షమాణాం రుదతీమనిందితాం |
సుపక్ష్మతామ్రాయతశుక్లలొచనామ్ |
అనువ్రతాం రామమతీవ మైథిలీం |
ప్రలొభయామాస వధాయ రావణః || 23
ఇత్యార్షే, శ్రీ మద్రామాయణే, వాల్మీకియే, ఆదికావ్యే, సుందరకాణ్డే, ఎకొనవింశః సర్గః