36 సర్గ
Download శుద్ద పాఠ్యం | Audio
భూయ ఏవ మహాతేజా హనూమాన్ మారుతాత్మజః |
అబ్రవీత్ ప్రశ్రితం వాక్యం సీతా ప్రత్యయ కారణాత్ || 1
వానరో౽హం మహాభాగే దూతొ రామస్య ధీమతః |
రామ నామాంకితం చేదం పశ్య దేవ్యంగుళీయకమ్ || 2
ప్రత్యయార్థం తవా౽౽నీతం తేన దత్తం మహాత్మనా |
సమాశ్వసిహి భద్రం తే క్షీణ దుఃఖ ఫలా హ్యాసి || 3
గృహీత్వా ప్రేక్షమాణా సా భర్తుః కర విభూషణమ్ |
భర్తారమివ సంప్రాప్తా జానకీ ముదితా౽భవత్ || 4
చారు తద్వదనం తస్యా స్తామ్ర శుక్లాయతేక్షణమ్ |
అశొభత విశాలాక్ష్యా రాహు ముక్త ఇవోడురాట్ || 5
తత స్సా హ్రీమతీ బాలా భర్తృసందేశ హర్షితా |
పరితుష్టా ప్రియం కృత్వా ప్రాశశంస మహాకపిమ్ || 6
విక్రాంత స్త్వం సమర్థ స్త్వం ప్రాఙ్ఞ త్వం వానరోత్తమ |
యే నేదం రాక్షస పదం త్వయైకేన ప్రధర్షితమ్ || 7
శత యొజన విస్తీర్ణః సాగరొ మకరాలయః |
విక్రమ శ్లాఘనీయేన క్రమతా గొష్పదీ కృతః || 8
న హి త్వాం ప్రాకృతం మన్యే వనరం వనర ఋషభ |
యస్య తే నాస్తి సంత్రాసొ రావణా న్నాపి సంభ్రమః || 9
అర్హసే చ కపిశ్రేష్ఠ మయా సమభిభాషితుమ్ |
యద్యసి ప్రేషిత స్తేన రామేణ విదితాత్మనా || 10
ప్రేషయిష్యతి దుర్ధర్షొ రామో న హ్యపరీక్షితమ్ |
పరాక్రమ మవిఙ్ఞాయ మత్సకాశం విశేషతః || 11
దిష్ట్యా చ కుశలీ రామో ధర్మాత్మా సత్య సంగరః |
లక్ష్మణశ్చ మహాతేజా స్సుమిత్రానంద వర్ధనః || 12
కుశలీ యది కాకుత్స్థః కిం ను సాగర మేఖలామ్ |
మహీం దహతి కొపేన యుగాంతాగ్ని రివోత్థితః || 13
అథవా శక్తిమంతౌ తౌ సురాణామపి నిగ్రహే |
మమైవ తు న దుఃఖానామస్తి మన్యే విపర్యయః || 14
కచ్చిన్న వ్యథితో రామః కచ్చిన్న పరితప్యతే |
ఉత్తరాణి చ కార్యాణి కురుతే పురుషోత్తమః || 15
కచ్చిన్న దీన స్సంభ్రాంతః కార్యేషు చ న ముహ్యతి |
కచ్చిత్ పురుష కార్యాణి కురుతే నృపతే స్సుతః || 16
ద్వివిధం త్రివిధోపాయ ముపాయమపి సేవతే |
విజిగీషు స్సుహృత్ కచ్చిన్మిత్రేషు చ పరం తపః || 17
కచ్చి న్మిత్రాణి లభతే మిత్రైశ్చా ప్యభిగమ్యతే |
కచ్చిత్ కల్యాణ మిత్రశ్చ మిత్రైశ్చాపి పురస్కృతః || 18
కచ్చి దాశాస్తి దేవానాం ప్రసాదం పార్థివాత్మజః |
కచ్చిత్ పురుషకారం చ దైవం చ ప్రతిపద్యతే || 19
కచ్చిన్న విగత స్నేహః ప్రయాసాన్మయి రాఘవః |
కచ్చిన్ మాం వ్యసనాత్ అస్మాన్ మొక్షయిష్యతి వానరః || 20
సుఖానా ముచితొ నిత్య మసుఖానా మనౌచితః |
దుఃఖ ముత్తర మాసాద్య కచ్చి ద్రామో న సీదతి || 21
కౌసల్యాయా స్తథా కచ్చిత్ సుమిత్రాయా స్తథైవ చ |
అభీక్ష్ణం శ్రూయతే కచ్చిత్ కుశలం భరతస్య చ || 22
మన్నిమిత్తేన మానార్హః కచ్చి చ్ఛోకేన రాఘవః |
కచ్చి న్యాన్యమనా రామః కచ్చి న్మాం తారయిష్యతి || 23
కచ్చి దక్షౌహిణీం భీమాం భరతొ భ్రాతృ వత్సలః |
ధ్వజినీం మంత్రిభి ర్గుప్తాం ప్రేషయిష్యతి మత్కృతే || 24
వానర అధిపతిః శ్రీమాన్ సుగ్రీవః కచ్చి దేష్యతి |
మత్కృతే హరిభిర్వీరై ర్వృతొ దంత నఖాయుధైః || 25
కచ్చిచ్చ లక్ష్మణః శూరః సుమిత్రానంద వర్ధనః |
అస్త్రవి చ్ఛరజాలేన రాక్షసాన్ విధమిష్యతి || 26
రౌద్రేణ కచ్చి దస్త్రేణ జ్వలతా నిహతం రణే |
ద్రక్ష్యా మ్యల్పేన కాలేన రావణం ససుహృజ్జనమ్ || 27
కచ్చిన్న తద్దేమసమాన వర్ణమ్ |
తస్యాననం పద్మ సమాన గంధి |
మయా వినా శుష్యతి శొక దీనమ్ |
జల క్షయే పద్మమివాతపేన || 28
ధర్మాపదేశాత్ త్యజతశ్చ రాజ్యం |
మాం చాపరణ్యం నయతః పదాతిమ్ |
నాసీద్ వ్యథా యస్య న భీః ర్న శొకః |
కచ్చిత్స ధైర్యం హృదయే కరొతి || 29
న చాస్య మాతా న పితా చ నాన్యః |
స్నేహా ద్విశిష్టొ౽స్తి మయా సమో వా |
తావత్వహం దూత జిజీవిషేయం |
యావత్ ప్రవృత్తిం శృణుయాం ప్రియస్య || 30
ఇతీవ దేవీ వచనం మహార్థం |
తం వానరేంద్రం మధురార్థ ముక్త్వా |
శ్రొతుం పున స్తస్య వచో౽భిరామం |
రామార్థయుక్తం విరరామ రామా || 31
సీతాయా వచనం శ్రుత్వా మారుతి ర్భీమ విక్రమః |
శిరస్యంజలి మాధాయ వాక్య ముత్తర మబ్రవీత్ || 32
న త్వా మిహస్థాం జానీతే రామః కమల లొచనః |
తేన త్వాం నానయ తాశ్యు శచీమివ పురందరః || 33
శ్రుత్వైవ తు వచొ మహ్యం క్షిప్ర మేష్యతి రాఘవః |
చమూం ప్రకర్షన్ మహతీం హర్యృక్ష గణ సంకులామ్ || 34
విష్టంభయిత్వా బాణౌఘై రక్షొభ్యం వరుణాలయమ్ |
కరిష్యతి పురీం లంకాం కాకుత్స్థః శాంత రాక్షసామ్ || 35
తత్ర యద్యంతరా మృత్యు ర్యది దేవా స్సహాసురాః |
స్థాస్యంతి పథి రామస్య స తానపి వధిష్యతి || 36
తవాదర్శనజే నార్యే శొకేన స పరిప్లుతః |
న శర్మ లభతే రామః సింహార్దిత ఇవ ద్విపః || 37
మలయేన చ వింధ్యేన మేరుణా మందరేణ చ |
దర్దురేణ చ తే దేవి శపే మూల ఫలేన చ || 38
యథా సునయనం వల్గు బింబౌష్ఠం చారుకుండలమ్ |
ముఖం ద్రక్ష్యసి రామస్య పూర్ణచంద్ర మివొదితమ్ || 39
క్షిప్రం ద్రక్ష్యసి వైదేహి రామం ప్రస్రవణే గిరౌ |
శతక్రతు మివాసీనం నాకపృష్ఠస్య మూర్ధని || 40
న మాంసం రాఘవొ భుంక్తే న చాపి మధుసేవతే |
వన్యం సువిహితం నిత్యం భక్త మశ్నాతి పంచమమ్ || 41
నైవ దంశా న్న మశకా న్న కీటా న్న సరీసృపాన్ |
రాఘవొ౽ పనయేత్ గత్రాత్ త్వద్గతే నాంతరాత్మనా || 42
నిత్యం ధ్యాన పరొ రామో నిత్యం శొక పరాయణః |
నాన్య చ్చింతయతే కించిత్ స తు కామవశం గతః || 43
అనిద్ర స్సతతం రామ స్సుప్తొ౽పి చ నరోత్తమః |
సీతేతి మధురాం వాణీం వ్యాహరన్ ప్రతిబుధ్యతే || 44
దృష్ట్వా ఫలం వా పుష్పం వా, యద్వా౽న్యత్ సుమనొహరమ్ |
బహుశొ హా ప్రియే త్యేవం ,శంసం స్త్వా మభిభాషతే || 45
స దేవి నిత్యం పరితప్యమాన,
స్త్వామేవ సీతే త్యభిభాషమాణః |
ధృతవ్రతొ రాజసుతొ మహాత్మా,
తవైవ లాభాయ కృత ప్రయత్నః || 46
సా రామ సంకీర్తన వీత శొకా,
రామస్య శొకేన సమాన శొకా |
శరన్ముఖే సాంబుద శేష చంద్రా,
నిశా ఇవ వైదేహ సుతా బభూవ || 47
ఇత్యార్షే శ్రీమద్రామాయణే, వాల్మీకియే, సుందరకాండే, షట్త్రింశః సర్గః