43 సర్గ
Download శుద్ద పాఠ్యం | Audio
తత స్స కింకరాన్ హత్వా హనూమాన్ స్థాన మాస్థితః |
వనం భగ్నం మయా చైత్యప్రాసాదొ న వినాశితః || 1
తస్మాత్ ప్రాసాదమ ప్యేవం భీమం విధ్వంసయా మ్యహమ్ |
ఇతి సంచింత్య మనసా హనుమాన్ దర్శయన్ బలమ్ || 2
చైత్య ప్రాసాద మాప్లుత్య మేరుశృంగ మివోన్నతమ్ |
ఆరురొహ కపి శ్రేష్ఠొ హనూమాన్ మారుతాత్మజః || 3
ఆరుహ్య గిరిసంకాశం ప్రాసాదం హరియూథపః |
బభౌ స సుమహాతేజాః ప్రతిసూర్య ఇవొదితః || 4
సంప్రధృష్య చ దుర్ధర్షః చైత్య ప్రాసాద మున్నతమ్ |
హనూమాన్ ప్రజ్వలన్ లక్ష్మ్యా పారియాత్రో మో౽భవత్ || 5
స భూత్వా సుమహాకాయః ప్రభావాత్ మారుతాత్మజః |
ధృష్ట మాస్ఫొటయామాస లంకాం శబ్దేన పూరయన్ || 6
తస్యాస్ఫొటిత శబ్దేన మహతా శ్రొత్ర ఘాతినా |
పేతుర్విహంగమా స్తత్ర చైత్యపాలాశ్చ మొహితాః || 7
అస్త్రవి జ్జయతాం రామో లక్ష్మణ శ్చ మహాబలః |
రాజా జయతి సుగ్రీవొ రాఘవే ణాభిపాలితః || 8
దాసొ౽హం కొసలేంద్రస్య రామ స్యాక్లిష్ట కర్మణః |
హనుమాన్ శత్రు సైన్యానాం నిహంతా మారుతాత్మజః || 9
న రావణ సహస్రం మే యుద్ధే ప్రతిబలం భవేత్ |
శిలాభి స్తు ప్రహరతః పాదపైశ్చ సహస్రశః || 10
అర్దయిత్వా పురీం లంకాం అభివాద్య చ మైథిలీమ్ |
సమృద్దార్థొ గమిష్యామి మిషతాం సర్వ రక్షసామ్ || 11
ఎవ ముక్త్వా విమానస్థ చైత్య పాలా హరి యూథపః |
ననాద భీమ నిర్హ్రాదొ రక్షసాం జనయన్ భయమ్ || 12
తేన శబ్దేన మహతా చైత్య పాలా శ్శతం యయుః |
గృహీత్వా వివిధా నస్త్రాన్ ప్రాసాన్ ఖడ్గాన్ పరశ్వధాన్ |
విసృజంతొ మహాకాయా మారుతిం పర్యవారయన్ || 13
తే గదాభి ర్విచిత్రాభిః పరిఘైః కాంచనాంగదైః |
అజఘ్న ర్వానరశ్రేష్ఠం బాణై శ్చాదిత్యసన్నిభైః || 14
ఆవర్త ఇవ గంగాయా స్తొయస్య విపులొ మహాన్ |
పరిక్షిప్య హరి శ్రేష్ఠం స బభౌ రక్షసాం గణః || 15
తతొ వాతాత్మజః క్రుద్ధొ భీమ రూపం సమాశ్రితః || 16
ప్రాసాదస్య మహాన్తస్య స్తంభం హేమ పరిష్కృతమ్ |
ఉత్పాటయిత్వా వేగేన హనూమాన్ మారుతాత్మజః |
తతస్తం భ్రామయామాస శత ధారం మహాబలః || 17
తత్ర చాగ్ని స్సమభవత్ ప్రాసాదశ్చా ప్యదహ్యత || 18
దహ్యమానం తతొ దృష్ట్వా ప్రాసాదం హరియూథపః |
స రాక్షసశతం హత్వా వజ్రే ణేంద్ర ఇవాసురాన్ |
అంతరిక్షే స్థిత శ్శ్రీమా నిదం వచన మబ్రవీత్ ||
మాదృశానాం సహస్రాణి విసృష్టాని మహాత్మనామ్ |
బలినాం వానరేంద్రాణాం సుగ్రీవ వశ వర్తినామ్ ||
అటన్తి వసుధాం కృత్స్నాం వయమన్యే చ వానరాః ||
దశనాగబలాః కేచిత్ కేచి ద్దశగుణొత్తరాః |
కేచిన్నాగసహస్రస్య బభూవు స్తుల్యవిక్రమాః || 22
సంతి చౌఘబలాః కేచిత్కేచి ద్వాయుబలొపమాః |
అప్రమేయబలా శ్చాన్యే తత్రాసన్ హరియూథపాః || 23
ఈదృగ్విధై స్తు హరిభిర్వృతో దంతనఖాయుధైః |
శతై శ్శత సహస్రై శ్చ కొటీభి రయుతై రపి |
ఆగమిష్యతి సుగ్రీవ స్సర్వేషాం వొ నిషూదనః ||
నేయ మస్తి పురీ లంకా న యూయం న చ రావణః |
యస్మా దిక్ష్వాకునాథేన బద్ధం వైరం మహాత్మనా ||
ఇత్యార్షే శ్రీమద్రామాయణే, వాల్మీకియే, సుందరకాణ్డే త్రిచత్వారింశః సర్గః