24 సర్గ
Download శుద్ద పాఠ్యం | Audio
తతః సీతాముపాగమ్య రాక్షస్యొ వికృతాననాః |
పరుషం పరుషా నార్య ఊచుస్తాం వాక్య మప్రియం || 1
కిం త్వ మంతఃపురే సీతే సర్వభూతమనొహరే |
మహార్హశయనొపేతే న వాస మనుమన్యసే || 2
మానుషీ మానుషస్యైవ భార్యాత్వం బహుమన్యసే |
ప్రత్యాహర మనొ రామా న్న త్వం జాతు భవిష్యసి || 3
త్రైలొక్యవసుభొక్తారం రావణం రాక్షసేశ్వరమ్ |
భర్తార ముపసంగమ్య విహరస్వ యథాసుఖం || 4
మానుషీ మానుషం తం తు రామ మిచ్ఛసి శొభనే |
రాజ్యాద్ భ్రష్ట మసిద్ధార్థం విక్లబం త్వ మనిందితే || 5
రాక్షసీనాం వచ శ్శ్రుత్వా సీతా పద్మనిభేక్షణా |
నేత్రాభ్యా మశ్రుపూర్ణాభ్యా మిదం వచన మబ్రవీత్ || 6
యదిదం లొక విద్విష్ట ముదాహరథ సంగతాః |
నైత న్మనసి వాక్యం మే కిల్బిషం ప్రతిభాతి వః || 7
న మానుషీ రాక్షసస్య భార్యా భవితు మర్హతి |
కామం ఖాదత మాం సర్వా న కరిష్యామి వో వచః || 8
దీనొ వా రాజ్యహీనొ వా యో మే భర్తా స మే గురుః |
తం నిత్య మనురక్తా౽స్మి యథా సూర్యం సువర్చలా || 9
యథా శచీ మహాభాగా శక్రం సముపతిష్ఠతి |
అరుంధతీ వసిష్ఠం చ రొహిణీ శశినం యథా || 10
లొపాముద్రా యథా౽గస్త్యం సుకన్యా చ్యవనం యథా |
సావిత్రీ సత్యవంతం చ కపిలం శ్రీమతీ యథా || 11
సౌదాసం మదయంతీవ కేశినీ సగరం యథా |
నైషధం దమయంతీవ భైమీ పతి మనువ్రతా |
తథా౽హ మిక్ష్వాకువరం రామం పతిమనువ్రతా || 12
సీతాయా వచనం శ్రుత్వా రాక్షస్యః క్రొధమూర్చితాః |
భర్త్సయంతి స్మ పరుషై ర్వాక్యై రావణచొదితాః || 13
అవలీన స్స నిర్వాక్యొ హనుమాన్ శింశుపాద్రుమే |
సీతాం సంతర్జయంతీ స్తా రాక్ససీ రశృణొత్ కపిః || 14
తా మభిక్రమ్య సంక్రుద్దా వేపమానాం సమంతతః |
భృశం సంలిలిహు ర్దీప్తాన్ ప్రలంబాన్ దశనచ్ఛదాన్ || 15
ఊచుశ్చ పరమక్రుద్ధాః ప్రగృహ్యాశు పరశ్వధాన్ |
నేయ మర్హతి భర్తారం రావణం రాక్షసాధిపమ్ || 16
సం భర్తస్యమానా భీమాభీ రాక్షసీభి ర్వరాననా |
సా బాష్ప మపమార్జంతీ శింశుపాం తా ముపాగమత్ || 17
తత స్తాం శింశుపాం సీతా రాక్షసీభి స్సమావృతామ్ |
అభిగమ్య విశాలాక్షీ తస్థౌ శొకపరిప్లుతా || 18
తాం కృశాం దీనవదనాం మలినాంబరధారిణీమ్ |
భర్త్సయాంచక్రిరే సీతాం రాక్షస్య స్తాం సమంతతః || 19
తతస్తాం వినతా నామ రాక్షసీ భీమదర్శనా |
అబ్రవీత్ కుపితాకారా కరాళా నిర్ణతొదరీ || 20
సీతే పర్యాప్త మేతావద్ భర్తుః స్నేహొ నిదర్శితః |
సర్వాత్రాతికృతం భద్రే వ్యసనా యోపకల్పతే || 21
పరితుష్టాస్మి భద్రం తే మానుష స్తే కృతొ విధిః |
మమాపి తు వచః పథ్యం బ్రువంత్యాః కురు మైథిలి || 22
రావణం భ్జ భర్తారం భర్తారం సర్వరక్షసామ్ |
విక్రాంతం రూపవంతం చ సురేశమివ వాసవమ్ |
దక్షిణం త్యాగశీలం చ సర్వస్య ప్రియదర్శనమ్ || 23
మానుషం కృపణం రామం త్యక్త్వా రావణమాశ్రయ |
దివ్యాంగరాగా వైదేహి దివ్యాభరణభూషితా || 24
అద్యప్రభృతి సర్వేషాం లొకనా మీశ్వరీ భవ |
అగ్నేః స్వాహా యథా దేవీ శచీ వేంద్రస్య శొభనే || 25
కిం తే రామేణ వైదేహి కృపణేన గతాయిషా |
ఏతదుక్తం చ మే వాక్యం యది త్వం న కరిష్యపి |
అస్మిన్ ముహూర్తే సర్వాస్త్వాం భక్షయిష్యామహే వయమ్ || 26
అన్యా తు వికటా నామ లబమానపయొధరా |
అబ్రవీత్ కుపితా సీతాం ముష్టి ముద్యమ్య గర్జతీ || 27
బహూ న్యప్రియరూపాణి వచనాని సుదుర్మతే |
అనుక్రొశా న్మృదుత్వాచ్చ సొఢాని తవ మైథిలి |
న చ నః కురుషే వాక్యం హితం కాలపురుస్కృతమ్ || 28
అనీతా౽సి సముద్రస్య పార మన్యై ర్దురాసదం |
రావణాంతఃపురం ఘొరం ప్రవిష్టా చాసి మైథిలి || 29
రావణస్య గృహే రుద్ధా మస్మాభిస్తు సురక్షితామ్ |
న త్వాం శక్తః పరిత్రాతు మపి సాక్షాత్ పురందరః || 30
కురుష్వ హితవాదిన్యా వచనం మమ మైథిలి |
అలమశ్రుప్రపాతేన త్యజ శొకమనర్థకం || 31
భజ ప్రీతిం ప్రహర్షం చ త్యజైతాం నిత్యదైన్యతామ్ |
సీతే రాక్షసరాజేన సహ క్రీడ యథాసుఖమ్ || 32
జానాసి హి యథా భీరు స్త్రీణాం యౌవన మధ్రువమ్ |
యావ న్న తే వ్యతిక్రామేత్ తావత్ సుఖ మవాప్నుహి || 33
ఉద్యానాని చ రమ్యాణి పర్వతొపవనాని చ |
సహ రాక్షసరాజేన చర త్వం మదిరేక్షణే || 34
స్త్రీసహస్రాణి తే సప్త వశే స్థాస్యంతి సుందరి |
రావణం భజ భర్తారం భర్తారం సర్వరక్షసామ్ || 35
ఉత్పాట్య వా తే హృదయం భక్షయిష్యామి మైథిలి |
యది మే వ్యాహృతం వాక్యం న యథావత్ కరిష్యసి || 36
తత శ్చండోదరీ నామ రాక్షసీ క్రొధమూర్ఛితా |
భ్రామయంతీ మహచ్చూల మిదం వచన మబ్రవీత్ || 37
ఇమాం హరిణలొలాక్షీం త్రాసొత్కంపిపయొధరాం |
రావణేన హృతాం దృష్ట్వా దౌర్హృదొ మే మహా నభూత్ || 38
యకృత్ ప్లీహ మథొత్పీడం హృదయం చ సబంధనమ్ |
అంత్రాణ్యపి తథా శీర్షం ఖాదేయ మితి మే మతిః || 39
తతస్తు ప్రఘసా నామ రాక్షసీ వాక్యమబ్రవీత్ |
కంఠ మస్యా నృశంసాయాః పీడయామ కిమాస్యతే || 40
నివేద్యతాం తతొ రాజ్ఙే మానుషీ సా మృతేతి హ |
నాత్ర కశ్చన సందేహః ఖాదతేతి స వక్ష్యతి || 41
తతస్త్వజాముఖీ నామ రాక్షసీ వాక్యమబ్రవీత్ |
విశస్యేమాం తత సర్వా స్సమాన్ కురుత పీలుకాన్ || 42
విభజామ తతః సర్వా వివాదొ మే న రొచతే |
పేయమానీయతాం క్షిప్రం లేహ్యముచ్చావచం బహు || 43
తత శ్శూర్పణఖా నామ రాక్షసీ వాక్య మబ్రవీత్ |
అజాముఖ్యా యదుక్తం హి తదేవ మమ రొచతే || 44
సురా చానీయతాం క్షిప్రం సర్వశొకవినాశినీ |
మానుషం మాం సమాస్వాద్య నృత్యామొ౽థ నికుంభిలామ్ || 45
ఏవం సంభర్త్స్యమానా సా సీతా సురసుతొపమా |
రాక్షసీభి స్సుఘొరాభిర్ ధైర్య ముత్సృజ్య రొదితి || 46
ఇత్యార్షే, శ్రీ మద్రామాయణే, వాల్మీకియే, ఆదికావ్యే, సుందరకాణ్డే, చతుర్వింశః సర్గః