22 సర్గ
Download శుద్ద పాఠ్యం | Audio
సీతాయ వచనం శ్రుత్వా పరుషం రాక్షసాధిపః |
ప్రత్యువాచ తతః సీతాం విప్రియం ప్రియదర్శనామ్ || 1
యథా యథా సాంత్వయితా వశ్యః స్త్రీణాం తథా తథా |
యథా యథా ప్రియం వక్తా పరిభూత స్తథా తథా || 2
సంనియచ్చతి మే క్రొధం త్వయి కామః సముత్థితః |
ద్రవతొ౽మార్గ మాసాద్య హయానివ సుసారథిః || 3
వామః కామో మనుష్యాణాం యస్మిన్ కిల నిబధ్యతే |
జనే తస్మిం స్త్వనుక్రొశః స్నేహశ్చ కిల జాయతే || 4
ఏతస్మాత్ కారణా న్న త్వాం ఘాతయామి వరాననే |
వధార్హ మవమానార్హాం మిథ్యాప్రవ్రజితే రతామ్ || 5
పరుషాణీహ వాక్యాని యాని యాని బ్రవీషి మామ్ |
తేషు తేషు వధొ యుక్తస్తవ మైథిలి దారుణః || 6
ఎకముక్త్వా తు వైదేహీం రావణొ రాక్షసాధిపః |
క్రొధసంరంభ సంయుక్త స్సీతా ముత్తర మబ్రవీత్ || 7
ద్వౌ మాసౌ రక్షితవ్యౌ మే యొ౽వధిస్తే మయా కృతః |
తతః శయన మారొహ మమ త్వం వరవర్ణిని || 8
ఊర్ధ్వం ద్వాభ్యాం తు మాసాభ్యాం భర్తారం మామనిచ్చతీమ్ |
మమ త్వాం ప్రాతరాశార్థ మారభంతే మహానసే || 9
తాం తర్జ్యమానాం సంప్రేక్ష్య రాక్షసేంద్రేణ జానకీమ్ |
దేవగంధర్వకన్యా స్తా విషేదు ర్వికృతేక్షణాః || 10
ఔష్ఠప్రకారై రపరా వక్త్ర నేత్రై స్తథా౽పరాః |
సీతా మాశ్వాసయామాసు స్తర్జితాం తేన రక్షసా || 11
తాభి రాశ్వాసితా సీతా రావణం రాక్షసాధిపమ్ |
ఉవా చాత్మహితం వాక్యం వృత్త శౌండీర్యగర్వితం || 12
నూనం న తే జనః కశ్చిదస్తి నిశ్శ్రేయసే స్థితః |
నివారయతి యో న త్వాం కర్మణొ౽స్మాద్విగర్హితాత్ || 13
మాం హి ధర్మాత్మనః పత్నీం శచీమివ శచీపతేః |
త్వదన్యస్త్రిషు లొకేషు ప్రార్థయే న్మనసా౽పి కః || 14
రాక్షసాధమ రామస్య భార్యా మమితతేజసః |
ఉక్తవా నసి యత్పాపం క్వ గత స్తస్య మొక్ష్యసే || 15
యథా దృప్తశ్చ మాతంగః శశశ్చ సహితౌ వనే |
తథా ద్విరదవ ద్రామ స్త్వం నీచ శశవత్ స్మృతః || 16
స త్వ మిక్ష్వాకునాథం వై క్షిప న్నిహ న లజ్జసే |
చక్షుషొ ర్విషయం తస్య న తావ దుపగచ్ఛసి || 17
ఇమే తే నయనే క్రూరే విరూపే కృష్ణపింగళే |
క్షితౌ న పతితే కస్మా న్మా మనార్య నిరీక్షతః || 18
తస్య ధర్మాత్మనః పత్నీం స్నుషాం దశరథస్య చ |
కథం వ్యాహరతొ మాం తే న జిహ్వా వ్యవశీర్యతే || 19
అసందేశాత్తు రామస్య తపస శ్చామపాలనాత్ |
న త్వాం కుర్మి దశగ్రీవ భస్మ భర్మార్హ తేజసా || 20
నాపహర్తు మహం శక్యా త్వయా రామస్య ధీమతః |
విధిస్తవ వధార్థాయ విహితొ నాత్ర సంశయః || 21
శూరేణ ధనదభ్రాత్రా బలై స్సముదితేన చ |
అపోహ్య రామం కస్మాద్ధి దారచౌర్యం త్వయా కృతమ్ || 22
సీతాయా వచనం శ్రుత్వా రావణొ రాక్షసాధిపః |
వివృత్య నయనే క్రూరే జానకీమన్వవైక్షత || 23
నీలజీమూతసంకాశొ మహాభుజశిరొధరః |
సింహసత్త్వగతిః శ్రీమాన్ దీప్త జిహ్వగ్రలొచనః || 24
చలాగ్రమకుటప్రాంశు శ్చిత్రమాల్యానులేపనః |
రక్తమాల్యాంబరధర స్తప్తాంగదవిభూషణః || 25
శ్రొణిసూత్రేణ మహతా మేచకేన సుసంవృతః |
అమృతొత్పాదనద్ధేన భుజగేనేవ మందరః || 26
తాభ్యాం స పరిపూర్ణాభ్యాం భుజాభ్యాం రాక్షసేశ్వరః |
శుశుభే౽చలసంకాశః శృంగాభ్యామివ మందరః || 27
తరుణాదిత్యవర్ణాభ్యాం కుండలాభ్యాం విభూషితః |
రక్తపల్లవపుష్పాభ్యా మశొకాభ్యా మివాచలః || 28
స కల్పవృక్షప్రతిమో వసంత ఇవ మూర్తిమాన్ |
శ్మశానచైత్యప్రతిమో భూషితొ౽పి భయంకరః || 29
అవేక్షమాణొ వైదేహీం కొపసంరక్తలొచనః |
ఉవాచ రావణ స్సీతాం భుజంగ ఇవ నిశ్శ్వసన్ || 30
అనయే నాభిసంపన్నమర్థహీన మనువ్రతే |
నాశయామ్యహమద్య త్వాం సూర్యః సంధ్యామివౌజసా || 31
ఇత్యుక్త్వా మైథిలీం రాజా రావణః శత్రురావణః |
సందిదేశ తత స్సర్వా రాక్షసీ ర్గొరదర్శనాః || 32
ఎకాక్షీ మేకకర్ణాం చ కర్ణప్రావరణాం తథా |
గొకర్ణీం హస్తికర్ణీం చ లంబకర్ణీ మకర్ణికాం || 33
హస్తిపాద్యశ్వపాద్యౌ చ గొపాదీం పాదచూళికామ్ |
ఎకాక్షీమేకపాదీం చ పృథుపాదీ మపాదికామ్ || 34
అతిమాత్రశిరొగ్రీవామతిమాత్రకుచొదరీమ్ |
అతిమాత్రాస్యనేత్రాం చ దీర్ఘజిహ్వమజిహ్వికాం |
అనాసికాం సిమ్హముఖీం గొముఖీం సూకరీముఖీమ్ || 35
యథా మద్వశగా సీతా క్షిప్రం భవతి జానకీ |
తథా కురుత రాక్షస్యః సర్వాః క్షిప్రం సమేత్య చ || 36
ప్రతిలొమానులొమైశ్చ సామదానాదిభేదనైః |
అవర్జయత వైదేహీం దండ స్యొద్యమనేన చ || 37
ఇతి ప్రతిసమాదిశ్య రాక్షసేంద్రః పునః పునః |
కామమన్యుపరీతాత్మా జానకీం పర్యతర్జయత్ || 38
ఉపగమ్య తతః క్షిప్రం రాక్షసీ ధాన్యమాలినీ |
పరిష్వజ్య దశగ్రీవ మిదం వచన మబ్రవీత్ || 39
మయా క్రీడ మహారాజ సీతయా కిం తవానయా |
వివర్ణయా కృపణయా మానుష్యా రాక్షసేశ్వర || 40
నూన మస్యా మహారాజ న దివ్యాన్ భొగసత్తమాన్ |
విదధా త్యమరశ్రేష్ఠ స్తవ బాహుబలార్జితాన్ || 41
అకామాం కామయానస్య శరీర ముపతప్యతే |
ఇచ్ఛంతీం కామయానస్య ప్రీతిర్భవతి శొభనా || 42
ఎవముక్తస్తు రాక్షస్యా సముత్‍క్షిప్త స్తతొ బలీ |
ప్రహసన్ మేఘసంకాశొ రాక్షసః స న్యవర్తత || 43
ప్రస్థితః స దశగ్రీవః కంపయన్నివ మేదినీమ్ |
జ్వలద్భాస్కర వర్ణాభం ప్రవివేశ నివేశనమ్ || 44
దేవగంధర్వకన్యాశ్చ నాగకన్యాశ్చ సర్వతః |
పరివార్య దశగ్రీవం వివిశు స్తద్ గృహొత్తమమ్ || 45
స మైథిలీం ధర్మపరా మవస్థితాం |
ప్రవేపమానాం పరిభర్స్య రావణః |
విహాయ సీతాం మదనేన మొహితః |
స్వమేవ వేశ్మ ప్రవివేశ భాస్వరమ్ || 46
ఇత్యార్షే, శ్రీ మద్రామాయణే, వాల్మీకియే, ఆదికావ్యే, సుందరకాణ్డే, ద్వావింశః సర్గః