49 సర్గ
Download శుద్ద పాఠ్యం | Audio
తత స్స కర్మణా తస్య విస్మితొ భీమ విక్రమః |
హనుమాన్ రొష తామ్రాక్షొ రక్షొ ధిప మవైక్షత || 1
భ్రాజమానం మహార్హేణ కాంచనేన విరాజతా |
ముక్తా జాలావృతే నాథ ముకుటేన మహాద్యుతిమ్ || 2
వజ్ర సంయోగ సమ్యుక్తై ర్మహార్హ మణి విగ్రహైః |
హైమై రాభరణై శ్చిత్రై ర్మనసేవ ప్రకల్పితైః || 3
మహార్హ క్షౌమ సంవీతం రక్త చందన రూషితమ్ |
స్వనులిప్తం విచిత్రాభి ర్వివిధాభిశ్చ భక్తిభిః || 4
వివృత్తే ర్దర్శనీయై శ్చ రక్తాక్షై ర్భీమ దర్శనైః |
దీప్త తీక్ష్ణ మహాదంష్ట్రైః ప్రలంబ దశనచ్ఛదైః || 5
శిరొభి ర్దశభి ర్వీరం భ్రాజమానం మహో జసమ్ |
నానా వ్యాళ సమాకీర్ణై శిఖరై రివ మందరమ్ || 6
నీలాంజనచయప్రఖ్యం హారే ణోరసి రాజతా |
పూర్ణ చంద్రాభవక్త్రేణ సబలాక మివాంబుదమ్ || 7
బాహుభి ర్బద్ధ కేయూరై శ్చందనోత్తమ రూషితైః |
భ్రాజమానాంగదైః పీనైః పంచ శీర్షై రివోరగైః || 8
మహతి స్ఫాటికే చిత్రే రత్న సంయోగ సంస్కృతే |
ఉత్తమాస్తరణాస్తీర్ణే సూపవిష్టం వరాసనే || 9
అలంకృతాభి రత్యర్థం ప్రమదాభి స్సమంతతః |
వాల వ్యజన హస్తాభి రారాత్ సముపసేవితమ్ || 10
దుర్ధరేణ ప్రహస్తేన మహాపార్శ్వేన రక్షసా |
మంత్రిభి ర్మంత్ర తత్త్వఙ్ఞై ర్నికుంభేన చ మంత్రిణా || 11
సుఖోపవిష్టం రక్షొభి శ్చతుర్భి ర్బల దర్పితైః |
కృత్స్నైః పరివృతో లొకః చతుర్భి రివ సాగరైః || 12
మంత్రిభి ర్మంత్ర తత్త్వఙ్ఞై రన్యైశ్చ శుభ బుద్ధిభిః |
అశ్వాస్యమానం రక్షోభి సురైరివ సురేశ్వరమ్ || 13
అపశ్య ద్రాక్షసపతిం హనూమా నతితేజసమ్ |
విష్ఠితం మేరు శిఖరే సతొయమివ తొయదమ్ || 14
స తైః సంపీడ్యమానొ౽పి రక్షొభి ర్భీమ విక్రమైః |
విస్మయం పరమం గత్వా రక్షొధిప మవైక్షత || 15
భ్రాజమానం తతొ దృష్ట్వా హనుమాన్ రాక్షసేశ్వరమ్ |
మనసా చింతయామాస తేజసా తస్య మొహితః || 16
అహొ రూపమహొ ధైర్య మహో సత్త్వ మహో ద్యుతిః |
అహో రాక్షస రాజస్య సర్వ లక్షణ యుక్తతా || 17
యద్యధర్మొ న బలవాన్ స్యాదయం రాక్షసేశ్వరః |
స్యాదయం సుర లొకస్య సశక్రస్యాపి రక్షితా || 18
అస్య క్రూరై ర్నృశం సైశ్చ కర్మభి ర్లొకకుత్సితైః |
సర్వే బిభ్యతి ఖల్వస్మా ల్లొకా స్సామరదానవాః || 19
అయం హ్యుత్సహతే క్రుద్ధః కర్తు మేకార్ణవం జగత్ |
ఇతి చింతాం బహు విధామకరొ న్మతిమాన్ కపిః |
దృష్ట్వా రాక్షస రాజస్య ప్రభావమమితౌజసః || 20
ఇత్యార్షే, శ్రీ మద్రామాయణే, వాల్మీకియే, సుందరకాండే, ఎకొనపంచాశః సర్గః