32 సర్గ
Download శుద్ద పాఠ్యం | Audio
తతః శాఖాంతరే లీనం దృష్ట్వా చలిత మానసా |
వేష్టితార్జునవస్త్రం తం విద్యుత్సంఘాతపింగళమ్ || 1 ||
సా దదర్శ కపిం తత్ర ప్రశ్రితం ప్రియ వాదినమ్ |
పుల్లాశొకొత్కరాభాసం తప్తచామీకరేక్షణం || 2 ||
మైథిలీ చింతయామాస విశ్మయం పరమం గతా |
అహొ భీమ మిదం రూపం వానరస్య దురాసదమ్ || 3 ||
దుర్నిరీక్షమితి జ్ఙాత్వా పునరేవ ముమొహ సా |
విలలాప భృశం సీతా కరుణం భయ మొహితా || 4 ||
రామ రామేతి దుఃఖార్తా లక్ష్మణేతి చ భామినీ |
రురొద బహుధా సీతా మందం మందస్వరా సతీ || 5 ||
సా తం దృష్ట్వా హరిశ్రేష్ఠం వినీతవ దుపస్థితమ్ |
మైథిలీ చింతయామాస స్వప్నొ౽యమితి భామినీ || 6 ||
సా వీక్షమాణా పృథుభుగ్నవక్త్రం, శాఖామృగేంద్రస్య యథొక్తకారమ్ |
దదర్శ పింగాధిపతే రమాత్యం, వాతాత్మజం బుద్ధిమతాం వరిష్ఠమ్ || 7 ||
సా తం సమీక్ష్యైవ భృశం విసంఙ్ఞా, గతాసు కల్పేవ బభూవ సీతా |
చిరేణ సంఙ్ఞాం ప్రతిలభ్య భూయో, విచింతయామాస విశాల నేత్రా || 8 ||
స్వప్నొ మయా౽యం వికృతొ౽ద్య దృష్టః శాఖా మృగః శాస్త్ర గణైః నిషిద్ధః |
స్వస్త్యస్తు రామాయ సలక్ష్మణాయ తథా పితుర్మే జనకస్య రాఙ్ఞః || 9 ||
స్వప్నొ౽పి నాయం న హి మే౽స్తి నిద్రా |
శొకేన దుఃఖేన చ పీడితాయాః |
సుఖం హి మే నాస్తి యతొ౽స్మి హీనా |
తేనేందు పూర్ణ ప్రతిమాననేన || 10
రామేతి రామేతి సదైవ బుద్ధ్యా, విచింత్య వాచా బ్రువతీ తమేవ |
తస్యానురూపం చ కథాం తదర్థ, మేవం ప్రపశ్యామి తథా శృణొమి || 11 ||
అహం హి తస్యాద్య మనొభవేన, సంపీడితా తద్గత సర్వ భావా |
విచింతయంతీ సతతం తమేవ, తథైవ పశ్యామి తథా శృణొమి || 12 ||
మనొ రథః స్యాదితి చింతయామి |
తథాపి బుద్ధ్యా చ వితర్కయామి |
కిం కారణం తస్య హి నాస్తి రూపమ్ |
సువ్యక్త రూపశ్చ వదత్యయం మామ్ || 13 ||
నమో౽స్తు వాచస్పతయే సవజ్రిణే, స్వయంభువే చైవ హుతాశనాయ చ |
అనేన చోక్తం యదిదం మమాగ్రతొ వనౌకసా తచ్చ తథాస్తు నాన్యథా || 14 ||
ఇత్యార్షే శ్రీమద్రామాయణే, వాల్మీకియే, సుందరకాండే ద్వాత్రింశః సర్గః