సప్తమ సర్గ
Download శుద్ద పాఠ్యం | Audio
స వేశ్మ జాలం బలవాన్ దదర్శ, వ్యాసక్త వైడూర్య సువర్ణ జాలమ్ |
యథా మహత్ప్రావృషి మేఘ జాలమ్, విద్యుత్పినద్ధం సవిహంగ జాలమ్ || 1
నివేశనానాం వివిధాశ్చ శాలాః, ప్రధాన శంఖ ఆయుధ చాప శాలాః |
మనొ హరాశ్చాపి పునర్విశాలా, దదర్శ వేశ్మాద్రిషు చంద్ర శాలాః || 2
గృహాణి నానా వసు రాజితాని, దేవాసురై శ్చాపి సుపూజితాని |
సర్వైశ్చ దొషైః పరివర్జితాని, కపిర్దదర్శ స్వ బలార్జితాని || 3
తాని ప్రయత్నాభిసమాహితాని, మయేన సాక్షాదివ నిర్మితాని |
మహీ తలే సర్వ గు ణోత్తరాణి, దదర్శ లంకాధిపతేర్ గృహాణి || 4
తతొ దదర్శోచ్చ్రిత మేఘ రూపమ్, మనొ హరం కాంచన చారు రూపమ్ |
రక్షొ అధిపస్యాత్మబలానురూపమ్, గృహోత్తమం హ్యప్రతిరూప రూపమ్ || 5
మహీ తలే స్వర్గ మివ ప్రకీర్ణమ్, శ్రియా జ్వలంతం బహు రత్న కీర్ణమ్ |
నానా తరూణాం కుసుమావకీర్ణమ్, గిరేరివాగ్రం రజసావకీర్ణమ్ || 6
నారీ ప్రవేకైరివ దీప్యమానమ్, తడిద్భి రంభొదవ దర్చ్యమానమ్ |
హంస ప్రవేకై రివ వాహ్యమానం, శ్రియా యుతం ఖే సుకృతాం విమానమ్ || 7
యథా నగాగ్రం బహు ధాతు చిత్రం, యథా నభశ్చ గ్రహ చంద్ర చిత్రమ్ |
దదర్శ యుక్తీ కృత మేఘ చిత్రం, విమాన రత్నం బహు రత్న చిత్రమ్ || 8
మహీ కృతా పర్వత రాజి పూర్ణా, శైలాః కృతా వృక్ష వితాన పూర్ణాః |
వృక్షాః కృతాః పుష్ప వితాన పూర్ణాః, పుష్పం కృతం కేసర పత్ర పూర్ణమ్ || 9
కృతాని వేశ్మాని చ పాండురాణి, తథా సుపుష్పా ణ్యాపి పుష్కరాణి |
పునశ్చ పద్మాని సకేసరాణి, ధన్యాని చిత్రాణి తథా వనాని || 10
పుష్పాహ్వయం నామ విరాజమానం, రత్న ప్రభాభిశ్చ వివర్ధమానమ్ |
వేశ్మాత్తమానాం అపి చోచ్చ మానం, మహా కపి స్తత్ర మహా విమానమ్ || 11
కృతాశ్చ వైడూర్యమయా విహంగా, రూప్య ప్రవాళైశ్చ తథా విహంగాః |
చిత్రాశ్చ నానా వసుభిర్భుజంగా, జాత్యా అనురూపాస్తురగా శుభాంగాః || 12
ప్రవాళ జాంబూనద పుష్ప పక్షాః, స్సలీలమావర్జిత జిహ్మ పక్షాః |
కామస్య సాక్షాదివ భాంతి పక్షాః, కృతా విహంగా స్సుముఖా సుపక్షాః || 13
నియుజ్యమానా స్తు గజా స్సుహస్తా, సకేసరా శ్చోత్పల పత్ర హస్తాః |
బభూవ దేవీ చ కృతా సుహస్తా, లక్ష్మీస్తథా పద్మిని పద్మ హస్తా || 14
ఇతీవ తద్గృహమభిగమ్య శొభనం, సవిస్మయో నగ మివ చారు శొభనమ్ |
పునశ్చ తత్ పరమ సుగంధి సుందరం, హిమాత్యయే నగమివ చారు కందరమ్ || 15
తతస్స తాం కపిరభిపత్య పూజితాం, చరన్ పురీం దశ ముఖ బాహు పాలితామ్ |
అదృశ్య తాం జనక సుతాం సుపూజితామ్, సుదుఃఖితః పతి గుణ వేగ నిర్జితామ్ || 16
తతస్తదా బహు విధ భావితాత్మనః, కృతాత్మనొ జనక సుతాం సువర్త్ననః |
అపశ్యతొ౽భవదతిదుఃఖితం మన, సుచక్షుషః ప్రవిచరతొ మహాత్మనః || 17
ఇత్యార్షే, శ్రీ మద్రామాయణే, వాల్మీకియే, ఆదికావ్యే, సుందరకాండే, సప్తమః సర్గః