31 సర్గ
Download శుద్ద పాఠ్యం | Audio
ఎవం బహు విధాం చింతాం చింతయిత్వ మహాకపిః |
సంశ్రవే మధురం వాక్యం వైదేహ్యా వ్యాజహార హ || 1
రాజా దశరథొ నామ రథ కుంజర వాజినామ్ |
పుణ్య శీలొ మహాకీర్తిః ఋజుః ఆసీన్ మహాయశాః || 2
రాజర్షీణాం గుణశ్రేష్ఠ స్తపసా చర్షిభిః స్సమః |
చక్ర వర్తి కులే జాతః పురందరసమోబలే || 3
అహింసా రతిః అక్షుద్రొ ఘృణీ సత్య పరాక్రమః |
ముఖ్యః చ ఇక్ష్వాకు వంశస్య లక్ష్మీవాన్ లక్ష్మి వర్ధనః || 4
పార్థివ వ్యంజనైః యుక్తః పృథు శ్రీః పార్థివర్షభః |
పృథివ్యాం చతురంతాయాం విశ్రుతః సుఖదః స్సుఖీ || 5
తస్య పుత్రః ప్రియొ జ్యేష్ఠః తారా అధిప నిభ ఆననః |
రామొ నామ విశేషఙ్ఞః శ్రేష్ఠః సర్వ ధనుష్మతామ్ || 6
రక్షితా స్వస్య ధర్మస్య స్వ జనస్య చ రక్షితా |
రక్షితా జీవ లొకస్య ధర్మస్య చ పరం తపః || 7
తస్య సత్య అభిసంధస్య వృద్ధస్య వచనాత్ పితుః |
సభార్యః సహ చ భ్రాత్రా వీరః ప్రవ్రజితొ వనమ్ || 8
తేన తత్ర మహారణ్యే మృగయాం పరిధావతా |
రాక్షసా నిహతాః శూరా బహవః కామరూపిణః || 9
జన స్థాన వధం శ్రుత్వా హతౌ చ ఖర దూషణౌ |
తత స్త్వమర్ష అపహృతా జానకీ రావణేన తు |
వంచయిత్వా వనే రామం మృగరూపేణ మాయయా ||
స మార్గమాణస్తాం దేవీం రామ స్సీతామనిందితామ్ |
ఆససాద వనే మిత్రం సుగ్రీవం నామ వానరమ్ ||
తత స్స వాలినం హత్వా రామః పరపురంజయః |
ప్రాయచ్ఛత్ కపిరాజ్యం తత్ సుగ్రీవాయ మహాబలః ||
సుగ్రీవేణాపి సందిష్టా హరయః కామరూపిణః |
దిక్షు సర్వాసు తాం దేవీం విచిన్వంతి సహస్రశః ||
అహం సంపాతివచనా చ్ఛతయొజన మాయతమ్ |
అస్యా హేతొ ర్విశాలాక్ష్యా స్సాగరం వేగవాన్ ప్లుతః ||
యథా రూపాం యథా వర్ణాం యథా లక్ష్మీం చ నిశ్చితామ్ |
అశ్రౌషం రాఘవస్య అహం సా ఇయం ఆసాదితా మయా ||
విరరామ ఎవం ఉక్త్వా౽సౌ వాచం వానర పుంగవః |
జానకీ చాపి తచ్ఛ్రుత్వా విస్మయం పరమం గతా ||
తతః స్సా వక్ర కేశాంతా సుకేశీ కేశ సంవృతమ్ |
ఉన్నమ్య వదనం భీరుః శింశపా వృక్షమైక్షత ||
నిశమ్య సీతా వచనం కపేశ్చ |
దిశశ్చ సర్వాః ప్రదిశశ్చ వీక్ష్య |
స్వయం ప్రహర్షం పరమం జగామ |
సర్వాత్మనా రామ మనుస్మరంతీ || 18
సా తిర్యగ్ ఊర్ధ్వం చ తథా అపి అధస్తాన్ |
నిరీక్షమాణా తం అచింత్య బుద్ధిమ్ |
దదర్శ పింగాధిపతేః అమాత్యమ్ |
వాతాత్మజం సూర్యం ఇవ ఉదయస్థమ్ || 19
ఇత్యార్షే శ్రీమద్రామాయణే, వాల్మీకియే, ఆదికావ్యే సుందరకాణ్డే ఎకత్రింశః సర్గః